İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 554 Hüküm no: 546 Orijinal metin no: [80a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sahipleri kaçan manifaturacı dükkânının açılarak içerisindeki eşyaların tesbit edilip dükkâna konulduğu ve dükkânın da mühürlendiği Firârî bezzâz eşyâsı Ma‘rûz Sâdır olan fermân-ı âlîlerine imtisâlen kıbel-i şer‘-i enverden mürsel Kâtib Süleyman Efendi İstanbul’da Bezzâzistân-ı atik kurbünde Sahhâflar sükûnda kâin bir bâb bezzâz dükkânına varıp dükkân-ı mezkûrda müsteciren mütemekkinler iken bundan akdem firâr ve gaybet-i münkatı‘a ile gāib olan Mike v. Adam ve Dimitri v. Vasil nâm zimmîler dükkân-ı mezkûru mukaffel terk etmeleriyle ma‘rifet-i şer‘ ve Kethudâ Derviş Mehmed Ağa b. İbrahim ve Mustafa Muhtâr Efendi b. İbrahim ve Mehmed Ağa b. Mehmed ve Mehmed Emin Ağa b. Salih nâm kimesneler hâzır oldukları hâlde dükkân-ı mezkûru feth ü küşâd ve derûnunda mevcûd bulunan gāibân-ı mersûmânın eşyâlarından yedi yüz elli guruş kıymetli bir aded fermâyiş şal ve beş yüz guruş kıymetli bir aded rızâyî şal ve üç yüz elli guruş kıymetli def‘a bir aded rızâyî şal ve altı yüz guruş kıymetli on iki aded Hind gezisi ve bin yüz guruş kıymetli yirmi iki aded Hind çitârîsi ve iki bin seksen guruş kıymetli yirmi beş aded iki yüz bir zirâ‘ Haleb sevâyîsi ve yüz kırk dört guruş kıymetli sekiz aded Şam kitâbîsi ve iki yüz otuz yedi buçuk guruş kıymetli dokuz buçuk aded bapril ve yüz altmış dokuz guruş kıymetli yüz on üç aded Haleb alacası ve bin iki yüz yetmiş dokuz guruş kıymetli kırk altı aded beş yüz kırk dört zirâ‘ İstanbul şalîsi ve yedi yüz yetmiş dokuz guruş kıymetli yirmi bir aded üç yüz yirmi sekiz zirâ‘ keremsûd ki cem‘an kıymetleri olan dokuz bin beş yüz on dört buçuk guruşa bâliğ olmağla takvîm olunan eşyâ-i muharrere-i mezkûreyi hâzırûn-ı Müslimûn-ı mezbûrûn huzûrlarında dükkân-ı mezkûra vaz‘ olunup ve dükkân-ı mezkûru temhîr eylediği mevlana-yı mezbûr mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr eylediği İstanbul Mahkemesi’nden huzûr. Fî 14 Şa‘bân sene [1]223.