İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 556 Hüküm no: 548 Orijinal metin no: [80b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kostantin v. Melame’nin sattığı un bedelinden bin sekiz yüz yetmiş üç kuruş alacağı olduğu iddiasıyla Artin v. Nehrat aleyhine açtığı davada iddiasını ispat edemediği 1.873 guruş 5 para men‘ Ma‘rûz Sâhib-i arzuhâl Kostantin v. Melame nâm zimmî meclis-i şer‘-i hatîrde derûn-ı arzuhâlde merkūmü’l-ism Artin v. Nehrat nâm zimmî muvâcehesinde bin iki yüz on dört senesi Rebî‘ülâhir’inin yirmi beşinci günü mersûm Artin zimmî beher vakıyyesi otuz ikişer akçeye olmak üzere iki def‘ada malımdan ve yedimden iştirâ ve kabz eylediği cem‘an yirmi dört bin dokuz yüz yetmiş beş vakıyye dakīk-i hâssü’l-hâs semeninden yedi bin dört yüz altmış guruşun beş bin beş yüz seksen altı guruş otuz beş parasını bana edâ ve teslîm mâ‘adâ bin sekiz yüz yetmiş üç guruş peş parası hâlâ zimmetinde olmağla taleb ederim deyü da‘vâ etdikde ol dahi cevâbında zikr olunan ol-mikdâr dakīk-i hâssü’l-hâssı müdde‘î-i mesfûrdan ol târihde si‘r-i râyici üzere beher vakıyyesini yirmi üç akçeye iştirâ ve kabz etmemle semeni olan cem‘an beş bin beş yüz seksen altı guruş otuz beş parayı kabzını mu‘terif olduğu üzere müdde‘î-i mesfûra def‘ ü teslîm etmiş idim deyip ziyâdeye şirâsını inkâr etmekle müdde‘î-i mersûm ber-vech-i muharrer ziyâde müdde‘âsına ikāmet-i beyyineden izhâr-ı acz birle bi’t-taleb mesfûr Artin zimmîye vech-i şer‘î üzere yemîn verilmeğin mûcebince müdde‘î-i mersûm Kostantin zimmî ziyâde müdde‘âsıyla mesfûr Artin zimmîye bilâ-beyyine mu‘ârazadan men‘ olunduğu İstanbul Mahkemesi’nden huzûr. Fî 25 Receb sene [1]223.