İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 556 Hüküm no: 549 Orijinal metin no: [80b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikfor v. Vartan’ın verdiği borç para karşılığında rehin aldığı bıçakçı dükkânı gediğini alacağını ödeyen Bıçakçı Haçador’a iadesine karar verildiği 220 guruş hüküm ve gedik fekki Ma‘rûz Sâhib-i arzuhâl bıçakçı esnâfından Haçador v. Markar nâm zimmî meclis-i şer‘-i münîrde yine esnâf-ı merkūmeden derûn-ı arzuhâlde merkūmü’l-ism Nikfor v. Vartan zimmî muvâcehesinde bin iki yüz on altı senesi Rebî‘ülevvel’inin yedinci günü mesfûr Nikfor zimmîden iktirâz ve kabz eylediğim iki yüz yirmi guruş deynim mukābelesinde İstanbul’da Boz Osman Câmi‘-i şerîfi tahtında kasab dükkânı civârında vâki‘ bir bâb bıçakçı dükkânı derûnunda mevcûde beyne’l-hıref gedik ta‘bîr olunur müstakıllen mülküm olan âlât-ı lâzıme-i ma‘lûmemi mersûm Nikfor zimmîye rehin vaz‘ ü teslîm ol dahi ber-vech-i muharrer irtihân ve kabz etmiş idi hâlâ meblağ-ı merkūm iki yüz yirmi guruşu yedimden ahz birle âlât-ı lâzıme-i merkūmeden keff-i yed ve bana teslîme mersûm Nikfor zimmîye tenbîh olunmak matlûbumdur deyü da‘vâ etdikde ol dahi cevâbında müdde‘î-i mersûm târih-i merkūmda âlât-ı lâzıme-i mezkûreyi malımdan ve yedimden makbûzu olan iki yüz elli guruşa bana bey‘ ve teslîm ben dahi iştirâ ve kabz etmemle ol-vechile mülk-i müşterâm olmak üzere zabt ve vaz‘-ı yed ederim deyip ve husûs-ı mezbûrda şirâ beyyinesi evlâ olmağla mesfûr Nikfor zimmî ber-vech-i muharrer şirâ müdde‘âsına ikāmet-i beyyineden izhâr-ı acz ve talebiyle mersûm Nikfor zimmîye vech-i şer‘î üzere yemîn verilmeğin mûcebince meblağ-ı merkūm iki yüz yirmi guruşu müdde‘î-i mesfûrdan ahz birle âlât-ı lâzıme-i merkūmeden keff-i yed ve müdde‘î-i mersûma teslîme mesfûr Nikfor zimmîye tenbîh olunduğu İstanbul Mahkemesi’nden huzûr. Fî 12 Şa‘bân sene [1]223.