İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 557 Hüküm no: 550 Orijinal metin no: [80b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Laska’nın zahire bedelinden Silahdar Abdullah Paşa’nın kızı Fatma Hanım’dan otuz sekiz kuruş alacağı olduğu 38 guruş hüküm Ma‘rûz Sâhib-i arzuhâl Bakkāl Laska v. Kostantin nâm zimmî meclis-i şer‘-i münîrde derûn-ı arzuhâlde mezkûretü’l-ism müteveffâ Silahdâr Abdullah Paşa kerîmesi Fatma Hanım tarafından husûs-ı âtîde vekîl olduğu zâtını ârifân el-Hâc Osman Ağa b. Abdullah ve İbrahim b. Musa nâm kimesneler şehâdetleriyle sâbit olan İsmail Efendi b. İbrahim mahzarında müvekkile-i mûmâ-ileyhâ Fatma Hanım zimmetinde işbu târih-i i‘lâmdan on beş sene mukaddem malımdan ve yedimden iştirâ ve kabz eylediği bâ-defter-i müfredât vezn ve fiyâtı ma‘lûm revgan-ı sâde ve asel ve pirinç ve zehâir-i sâire semenlerinden cem‘an bin iki yüz altmış yedi guruşun elli beş guruşunu bana def‘ ü teslîm etmekle bâkīsi olan bin iki yüz on iki guruşu müvekkile-i mûmâ-ileyhâdan hâlâ talebe ederim deyü da‘vâ etdikde kefîl-i merkūm dahi cevâbında müvekkilem mûmâ-ileyhâ Fatma Hanım işbu sene-i mübâreke Muharrem’inde âşûra tabhı levâzımı’çün müdde‘î bakkāl-i mesfûrdan ancak doksan üç guruşluk zehâir-i ma‘lûme iştirâ ve kabz edip semeni olan meblağ-ı merkūmdan müdde‘î-i mesfûrun kabzını mu‘terif olduğu elli beş guruşdan mâ‘adâ sahhu’l-bâkī otuz sekiz guruş zimmetinde deyni kalmışdır deyü ol-mikdârını bi’l-vekâle ikrâr ziyâde müdde‘âsını külliyen inkâr edip ve müdde‘î-i mesfûrun takrîri üzere on beş seneden beri müvekkile-i mûmâ-ileyhâ Fatma Hanım ve gerek zimmî-i mersûm Âsitâne-i aliyye’de sâkinler olup husûs-ı mezkûru da‘vâ mümkün iken da‘vâ etmeyip bilâ-özr sükût eylediğini zimmî-i mesfûr mu‘terif olmağla bu makūle on beş sene bilâ-özr terk olunan da‘vâ bilâ-emr mesmû‘a olmamağla ziyâde müdde‘âsına iltifât olunmayıp ancak vekîl-i mezbûrun ikrârıyla lâzım gelen meblağ-ı bâkī-ı merkūm otuz sekiz guruşu müdde‘î-i zimmî-i mesfûra edâsıyla müvekkile-i mûmâ-ileyhâya izâfetle vekîl-i merkūm ilzâm olunduğu İstanbul Mahkemesi’nden huzûr. Fî 13 Şa‘bân sene [1]223.