İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 558 Hüküm no: 551 Orijinal metin no: [80b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esma Kadın’ın görmeden satın aldığı altı adet mavna için Lüleci İbrahim Beşe’ye yaptığı altı bin kuruşunun satışın iptal edilmesi üzerine kendisine iadesine karar verildiği 6.000 guruş hüküm Ma‘rûz Medîne-i Üsküdar’a muzâfe Beylerbeyi nâm mahâlde sâkine merhûm Yusuf Efendizâde halîlesi demekle ârifesâhibe-i arzuhâl Esma Kadın bt. Abdullah tarafından husûs-ı âtîde vekîl olduğu zâtını ârifân Hafız Yusuf Ağa b. İbrahim ve es-Seyyid el-Hâc Yusuf b. Hüseyin şehâdetleriyle sâbit olan es-Seyyid Feyzullah b. Ömer nâm kimesne meclis-i şer‘-i münirde Lüleci İbrahim Beşe b. Ahmed nâm kimesne muvâcehesinde reisler kethudâsı hâzır olduğu hâlde mezbûr İbrahim Beşe bâ-hüccet yedinde mülkü olan Galata’da Eski Yağkapanı İskelesi’nde merbût altı aded mavnalarını gedikleriyle ma‘an işbu sene-i mübâreke Cumâdelûlâ’nın ikinci günü altı bin guruş semen tesmiyesiyle müvekkilem mezbûre Esma Kadın’a kezâlik bâ-hüccet bey‘ ol dahi zikr olunan mavnaları görmeden iştirâ ve semen-i merkūm altı bin guruşu ber-vech-i peşîn bâyi‘-i merkūm İbrahim Beşe’ye teslîm etdikden sonra sâlifü’z-zikr mavnaları bu esnâda gördükde beğenmeyip müvekkilem mezbûre için şer‘an hıyar-ı rü’yet olmağla bey‘-i mezkûru feshetmekle semen nâmıyla makbûzu olan meblağ-ı merkūm altı bin guruşu merkūm İbrahim Beşe’den bi’l-vekâle istirdâd murâdımdır deyü da‘vâ etdikde ol dahi cevâbında kaziyye minvâl-i meşrûh üzere olduğunu bi-tamamihâ tâyi‘an ve kat‘iyyen ikrâr ü i‘tirâf etmeğin mûcebince makbûzu olan meblağ-ı merkūm altı bin guruşu müvekkile-i mezbûre Esma Kadın için müdde‘î-i vekîl-i merkūma redd ü teslîme mezbûr İbrahim Beşe’ye tenbîh olunduğu İstanbul Mahkemesi’nden huzûr. Fî-gurreti Şa‘bân sene [1]223.