İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 560 Hüküm no: 553 Orijinal metin no: [81a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Habbaz Yusuf Beşe’nin zahire bedelinden doksan altı kuruş otuz iki para alacağı ve zimmetinde bir adet emanet verdiği atı olduğu iddiasıyla Ohannes v. Artin aleyhine açtığı davasında iddiasını ispat edemediği 96 guruş 32 para ile bârgir men‘i Ma‘rûz Habbâz tâifesinden Yusuf Beşe b. Mehmed nâm kimesne meclis-i şer‘-i münîrde arzuhâl eden Ohannes v. Artin nâm zimmî muvâcehesinde mesfûr Ohannes zimmî zimmetinde bundan akdem malımdan ve yedimde iştirâ ve kabz eylediği yüz yirmi vakıyye dakīk-i hâs semeninden yirmi üç guruş ve otuz altı keyl hınta semeninden yetmiş üç guruş otuz iki para ki cem‘an doksan altı guruş otuz iki para alacak hakkım olmağla meblağ-ı mezbûr ile zimmî-i mesfûr yedine bundan akdem îdâ‘ ve teslîm eylediğim malımdan iki yüz beş guruş kıymetli bir re’s bârgiri mersûm Ohannes zimmîden hâlâ taleb ederim deyü da‘vâ etdikde ol dahi cevâbında zikr olunan dakīk ile hınta şirâsını külliyen inkârından mâ‘adâ müdde‘î-i merkūmun bana îdâ‘ ve teslîm eylediği sâlifü’z-zikr bârgir yed ve hıfzımda iken bilâ-ta‘ad hank-ı ânife helâk olmuşdur deyü ve müdde‘î-i mezbûr Yusuf Beşe ber-minvâl-i muharrer dakīk ve hınta semenleri müdde‘âsına ikāmet-i beyyineden izhâr-ı acz edip ve mesfûr Ohannes bârgir husûsunda dahi yemîniyle tasdîk olunur makūleden olmağla bi’t-taleb sâlifü’l-beyân dakīk ve hıntası olmadığına ve bârgir husûsunda dahi üzerine red ü damân lâzım olmadığına mesfûr Ohannes zimmîye vech-i şer‘î üzere yemîn verilmeğin mûcebince müdde‘î-i merkūm Yusuf Beşe da‘vâ-yı mezkûreleriyle bilâ-beyyine ve bî-vech mu‘ârazadan men‘ olunduğu İstanbul Mahkemesi’nden huzûr. Fî 9 Receb sene [1]223.