İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 561 Hüküm no: 555 Orijinal metin no: [81a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Varnalı Tohari’nin sattığı çerviş yağı bedelinden Bakkal Mihal’den beş yüz doksan bir guruş yirmi sekiz para alacağı olduğu 591 guruş 28 para hüküm Ma‘rûz Sâhib-i arzuhâl Varnalı Tohari v. Dimitraki nâm zimmî evvelâ Çarşamba günü dîvân-ı âlîde ve ba‘dehû du‘âhâne-i dâ‘îlerinde ma‘kūd meclis-i şer‘-i hatîrde derûn-ı arzuhâlde merkūmü’l-ism Bakkāl Mihal v. Anton nâm zimmî muvâcehesinde bin iki yüz yirmi iki senesi Ramazan’ında mesfûr Mihal zimmî malımdan ve yedimden beher vakıyyesi altmış birer paraya olmak üzere iştirâ ve kabz eylediği üç yedek revgan-ı çervişden iki yedek revgan-ı çervişin semenlerini bana tamamen edâ ve teslîm ve mâ‘adâ bir yedek üç yüz seksen sekiz vakıyye revgan-ı çervişin semeni olan beş yüz doksan bir guruş yirmi sekiz para hâlâ mesfûrun zimmetinde olmağla meblağ-ı mezbûru zimmî-i mersûmdan taleb ederim deyü da‘vâ etdikde ol dahi cevâbında müdde‘î-i mesfûrdan ancak iki yedek revgan-ı çerviş iştirâ ve ahz etmemle semenlerini kabzını mu‘terif olduğu üzere kendüye edâ ve teslîm etmiş idim deyip mâ‘adâ müdde‘âsı olan sâlifü’z-zikr bir yedeği Boğaziçi’nden İstanbul’a getirirken Kuruçeşme ustası görüp gümrüğümden firârîdir deyü ahz ve ser-bostaniyân-ı hâssa ağa tarafına teslîm etmiş olup ben almadım deyü inkâr etmekle müdde‘î-i mesfûr Tohari zimmî ber-vech-i muharrer ziyâde müdde‘âsına ikāmet-i beyyineden izhâr-ı acz birle bi’t-taleb mersûm Mihal zimmîye üç def‘a yemîn teklif olundukda ol dahi yemînden nükûl etmeğin mûcebince semeni olan meblağ-ı merkūm beş yüz doksan bir guruş yirmi sekiz parayı müdde‘î-i mersûm Tohari zimmîye edâ ve teslîme mesfûr Mihal zimmîye tenbîh olunduğu İstanbul Mahkemesi’nden huzûr. Fî 15 Şa‘bân sene [1]223.