İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 562 Hüküm no: 556 Orijinal metin no: [81a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uzuncaabad-ı Hasköy Naibi Mustafa Edip Efendi’nin alacağı olduğu iddiasıyla Yenibahçeli Muhzır Osman Efendi aleyhine açtığı davada dört yüz yetmiş kuruşa sulh olduğu 470 guruşa sulh Ma‘rûz Medîne-i Sofya’da Câmi‘-i kebîr mahallesinde sâkin Edirne müderrislerinden sâbıkā Uzuncaabad-ı Hasköy nâibi olan Mustafa Edip Efendi b. Abdullah tarafından ber-vech-i âtî taleb ve da‘vâ ve ahz ü kabza ve lede’l-iktizâ sulh ve ibrâya vekîl olduğu Ahmed Ağa b. Hasan ve Tatar Mustafa b. Osman nâm kimesneler şehâdetleriyle sâbit olan mevâlî-i fihâmdan muvakkaten Sofya Kādısı fazîletlü Abdulfettah Efendi meclis-i şer‘-i münîrde kuzâtdan Yenibağçeli Muhzır Hasan Ağazâde es-Seyyid Osman Efendi tarafından husûs-ı âtîde müseccel vekîli es-Seyyid Mehmed Salim Efendi b. Mehmed Şerif mahzarında müvekkilim mûmâ-ileyhin bundan akdem mârrü’z-zikr Uzuncaabad-ı Hasköy Kazâsı’nda niyâbeti esnâsında müvekkil-i mezbûr es-Seyyid Osman Efendi kapı kethudâsı olmak takrîbiyle kazâ-i merkūm şehriyelerine mahsûben irsâl eylediği poliçelerden kapıkethudâsı müvekkil-i mezbûra ziyâde geçip reddi lâzım gelen altı yüz kırk iki guruşa müvekkilim mûmâ-ileyh için bi’l-vekâle merkūm es-Seyyid Osman Efendi’den taleb ve da‘vâ eylediğimde ol dahi cevâbında niyâbet-i mezkûre husûsi’çün müvekkilin mûmâ-ileyhe mahsûsan irsâl eylediğim tatar için iki yüz elli guruş ücret vermiş idim meblağ-ı merkūmun ol-mikdârına takas ve mahsûb ederim deyip ol-vechile beynimizde ba‘de’l-münâza‘a bâ-vesâtet-i muslihîn ben ber-minvâl-i muharrer tasaddî eylediğim da‘vâ-yı mezkûreden müvekkil-i mezbûr es-Seyyid Osman Efendi’ye izâfetle işbu vekîli merkūm ile dört yüz yetmiş guruşa bi’l-vekâle ba‘de akdi’l-musâlaha ve’l-kabûl bedel-i sulh-ı merkūm dört yüz yetmiş guruşu işbu meclis-i şer‘de tamamen ve kâmilen bi’l-vekâle ahz ü kabz edip mâ‘adâya ve bi’l-cümle husûs-ı mezkûra müte‘allika âmme-i da‘vâdan müvekkil-i mezbûr es-Seyyid Osman Efendi’nin zimmetini kabûlü hâvî bi’l-vekâle ibrâ ve iskāt eyledim dedikde vekîl-i merkūm dahi tasdîk eylediği İstanbul Mahkemesi’nde tescîl ve huzûr. Fî 17 Receb sene 1223.