İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 564 Hüküm no: 558 Orijinal metin no: [81b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kurdoğlu Yorgaki’nin kızıyla evlenmekten vazgeçen nişanlısı Yanko v. Vasil aleyhine açtığı davada üç yüz otuz kuruşa sulh olduğu 300 guruşa sulh Ma‘rûz Sâhib-i arzuhâl neccâr kalfalarından Kurdoğlu Yorgaki v. Yani nâm zimmî meclis-i şer‘-i hatîrde derûn-ı arzuhâlde merkūmü’l-ism Yanko v. Vasil nâm zimmî muvâcehesinde mesfûr Yanko zimmî bundan akdem sulbiye kebîre kızım Angelika nâm bikr-i bâliğa-i Nasrâniyeyi tezevvüce tâlib oldukda ben dahi malımdan dört yüz elli guruş kıymetli bir elmas yüzük ve üç yüz elli guruş kıymetli on aded işleme dülbend çevreleri nişân nâmıyla zimmî-i mesfûra vermiş idim lâkin zimmî-i mesfûr kızım mersûmeyi tezevvücden ibâ ve imtinâ‘ etmekle ben dahi ber-vech-i muharrer nişân nâmıyla verdiğim eşyâ-i muharrere-i mezkûreyi istirdâd ederim deyü da‘vâ eylediğimde ol dahi ber-vech-i muharrer eşyâ-i merkūmeyi ahz ve istihlâkini ikrâr ve ol-vechile beynimizde ba‘de vukū‘i’l-münâza‘a bâ-vesâtet-i muslihîn ben tasaddî eylediğim da‘vâ-yı mezkûremden mersûm Yanko zimmî ile üç yüz otuz guruş bedel-i makbûza ba‘de akdi’l-musâlaha ve’l-kabûl mâ‘adâya ve bi’l-cümle husûs-ı mezkûra müte‘allika âmme-i da‘vâdan mesfûr Yanko zimmînin zimmetini kabûlü hâvî ibrâ ve iskāt eyledim deyü ikrâr ve tasdîkleri İstanbul Mahkemesi’nde tescîl ve huzûr. Fî 15 Ş sene [1]223.