İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 565 Hüküm no: 560 Orijinal metin no: [81b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Geredeli Gezoğlu İsmail’in sattığı kösele bedelinden alacağı olduğu iddiasıyla tüccarlardan Osman ve Mehmed aleyhine açtığı davada iddiasını ispat edemediği 166 guruş men‘ Ma‘rûz Sâhib-i arzuhâl Geredeli Gezoğlu es-Seyyid el-Hâc İsmail b. es-Seyyid el-Hâc Ömer meclis-i şer‘-i münîrde derûn-ı arzuhâlde mezkûrü’l-ism tâcir esnâfından el-Hâc Osman b. Osman ve Mustafa b. Mehmed muvâcehelerinde târih-i i‘lâmdan iki sene mukaddem marrü’z-zikr Gerede Kazâsı’ndan Katırcı yediyle malımdan beheri altışar guruşa olmak üzere mezbûrân el-Hâc Osman ve Mustafa’ya irsâl ve teslîm onlar dahi ber-vech-i muharrer kabz eyledikleri yüz seksen sekiz aded gâvsele semenlerinden zimmetlerinde cem‘an bin yüz on bir guruş alacağımdan dört yüz elli guruşunu bana edâ ve teslîm etmeleriyle bâkīsi olan altı yüz altmış bir guruşu mezbûrândan hâlâ taleb ederim deyü da‘vâ etdikde onlar dahi cevâblarında husûs-ı mezkûru külliyen inkârlarından mâ‘adâ müdde‘î-i merkūm târih-i mezkûrda Âsitâne-i aliyye’ye gelip husûs-ı mezkûru Lonca Odası’nda huzûr-ı Müslimînde bizden da‘vâya tasaddî biz dahi inkâr birle beynimizde ba‘de’l-münâza‘a bâ-vesâtet-i muslihîn müdde‘î-i merkūm da‘vâ-yı mezkûresinden bizimle kabzını mu‘terif olduğu meblağ-ı merkūm dört yüz elli guruşa sulh olup mâ‘adâya ve bi’l-cümle husûs-ı merkūma müte‘allika âmme-i da‘vâdan bizim zimmetimizi ibrâ ve iskāt biz dahi ibrâ-i mezkûrunu kabûl etmişidik deyü eyledikleri def‘lerini müdde‘î-i merkūm şehâdetlerinde tasdîk ve adâletlerinde tahkīk eylediği esnâf-ı merkūmeden el-Hâc Halil Ağa b. el-Hâc Abdurrahman ve Ali Ağa b. Hüseyin ve Hamza Beşe b. Abdullah ve Mustafa b. el-Hâc İbrahim nâm kimesneler şehâdetleriyle bi’l-muvâcehe vech-i vecîh-i şer‘î üzere isbât etmeğin mûcebince müdde‘î-i mezbûr es-Seyyid el-Hâc İsmail da‘vâ-yı mezkûresiyle merkūmân el-Hâc Osman ve Mustafa’ya bî-vech mu‘ârazadan men‘ olunduğu İstanbul Mahkemesi’nden huzûr. Fî 16 Ş sene [1]223.