İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 567 Hüküm no: 564 Orijinal metin no: [81b-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma bt. Abdullah’ın Mehmed Emin Efendi ve kardeşi İsmail Efendi aleyhine açtığı iki yüz kuruşluk alacak davasının meşru olmadığı 200 guruş men‘ Ma‘rûz Zât-ı ta‘rîf-i şer‘î ile mu‘arrefe olan Fatma bt. Abdullah nâm hatun meclis-i şer‘-i münîrde hâcegân-ı dîvân-ı hümâyûndan Mehmed Emin Efendi ve birâderi İsmail Efendi ibney-i Silâhşor-i hâssa Süleyman Ağa mahzarlarında mûmâ-ileyhimâ ile karındaşları Mustafa İzzet ve Hadice Hanım’ın bi’l-icâreteyn taht-ı tasarruflarında olan İstanbul’da Aksaray kurbünde Tozkoparan nâm mahâlde kâin bir bâb bozacı kârhânesinde müşâhereten müstecir olan gāib ani’l-beled Ovannes nâm zimmîye bundan akdem malımdan karz verdiğim iki yüz guruş mukābelesinde kârhâne-i mezkûre derûnunda mevcûde olan âlât-ı lâzımesini bana rehin vaz‘ ü teslîm etdikden sonra zimmî-i mesfûr firâr ve gaybet edip kârhâne-i mezkûreyi mûmâ-ileyhimâ zabt ve âhara îcâr eylediklerine binâen zimmî-i gāib-i mesfûr zimmetinde alacağım olan meblağ-ı merkūmu mûmâ-ileyhimâ Mehmed Emin Efendi ve İsmail Efendi mallarından bana zâmin olsunlar deyü takrîr-i meşrûhu üzere tasaddî eylediği da‘vâsı şer‘an mesmû‘a olmamağla mûmâ-ileyhimâya suâl dahi teveccüh etmeyip bî-vech mu‘ârazadan men‘ olunduğu İstanbul Mahkemesi’nden huzûr. Fî 12 Şa‘bân sene 1223.