İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 568 Hüküm no: 565 Orijinal metin no: [82a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Ağa’nın tasarrufunda olan vakıf menzile kattığı yer üzerine yaptığı binayı yıkarak menzili asli heyetine uygun hale getirmeye söz verdiği Tavâşî Süleymanağa mahallesinde menzil hedmi Ma‘rûz Sâdır olan fermân-ı âlîlerine imtisâlen cânib-i şer‘-i münîrden mürsel keşif nâibimiz Merhabâzâde Mahmud Efendi hâssa mi‘mârı hulefâsından es-Seyyid Mustafa ve Selim halîfeler ile İstanbul’da Kumkapı kurbünde vâki‘ nezâret-i dâ‘îlerinde olan evkāfdan Tavâşî Süleyman Ağa Câmi‘-i şerîfine varıp cerîdede mazbûtü’l-esâmî Müslimîn huzûrlarında akd-i meclis-i şer‘-i kavîm etdikde sâlifü’z-zikr Tavâşî Süleyman Ağa Vakfı’na li-ecli’l-maslaha kāimmakām-ı mütevellî nasb olunan İmâm Hasan Efendi b. Yahya meclis-i ma‘kūd-ı mezkûrda vakf-ı mezbûr mütevellîsi Yakub b. Ahmed hâzır olduğu hâlde vakf-ı merkūm müsakkafâtından zikri âtî menzile bi’l-icâreteyn mutasarrıf olan es-Seyyid İsmail Ağa b. Ali mahzarında mezbûr es-Seyyid İsmail Ağa mutasarrıf olduğu menzil-i mezkûru bu esnâda hedm ve câmi‘-i mezkûrun bi’r-i mâ ve maslak ve tabutluk mahâllinin ulüvvünden mi‘mârân-ı mezbûrân mesâhalarıyla tûlen ve arzen bi-hesâbı terbî‘î on zirâ‘ üç parmak ulüv mahâllini gasb ve üzerine binâ ihdâs etmekle men‘ ve ihdâs eylediği binâ ref‘ olunmak matlûbumdur deyü kāimmakāmlığı hasebiyle da‘vâ etdikde mezbûr es-Seyyid İsmail Ağa dahi cevâbında mütevellî-i hâzır-ı merkūmun izniyle binâ ve ihdâs eyledim demesi şer‘an müvecceh olmadığından mâ‘adâ mahâll-i mezbûru gasb eylediğini mahalle-i mezbûre ahâlisinden el-Hâc Mehmed Ağa b. İbrahim ve Hasan Ağa b. Ahmed ve Selim Ağa b. Abdullah ve Mustafa Ağa b. Ahmed ve Za‘îm Mustafa Ağa b. Ahmed ve el-Hâc Hafız Mehmed Efendi b. Ali ve Manav Ahmed Beşe ve Ebûbekir ve Hasan nâm kimesneler alâ-tarîki’ş-şehâde haber vermeleriyle mûcebince mezbûr es-Seyyid İsmail Ağa menzil-i merkūma ilhâk eylediği mahâll-i mezkûr üzerine ihdâs olunan ebniyeyi hedm vâkı‘a ba‘de’t-tenbîh menzil-i mezkûru dahi heyet-i kadîmesi üzere binâya ta‘ahhüd eylediğini mevlana-yı mezbûr mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr eylediği İstanbul Mahkemesi’nden huzûr. Fî 11 Şa‘bân sene 1223.