İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 577 Hüküm no: 575 Orijinal metin no: [83b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Habibe bt. Ali’nin tasarrufunda olan cameşuycu dükkânının tamiri için malından iki yüz yirmi beş buçuk kuruş harcama yaptığını iddia eden kiracı Ahmed Beşe’nin iddiasını ispat edemediği Karagümrük’de câmeşûycu gediği Ma‘rûz Sâhib-i arzuhâl câmeşûycu esnâfından Ahmed Beşe b. Mehmed meclis-i şer‘-i münîrde zâtı ta‘rîf-i şer‘î ile mu‘arrefe olan Habibe bt. Ali nâm hatun muvâcehesinde İstanbul’da Karagümrük Çarşısı’nda vâki‘ bir bâb câmeşûycu dükkânı derûnunda mevcûde beyne’l-hıref gedik ta‘bîr olunan âlât-ı lâzıme-i ma‘lûme mezbûre Habibe Hatun’un bâ-hüccet müstakılleten yedinde mülkü olmağla târih-i i‘lâmdan bir sene mukaddem gedik ta‘bîr olunan âlât-ı lâzıme-i merkūmeyi beher mâh dörder guruş kirâ mukāvelesiyle bana îcâr ve teslîm ben dahi istîcâr ve kabûl ve dükkân-ı mezkûrun ta‘mîr ve termîmi için bana seksen guruş verip lâkin kifâyet etmemekle ben bâ-defter-i müfredât malımdan iki yüz yirmi beş buçuk guruş dahi harc ü sarfla ta‘mîr ve tekmîl edip bu esnâda beni dükkân-ı mezkûrdan ihrâc ve gediğini âhara füruht etmekle ben dahi masrûfum olan meblağ-ı merkūmu mezbûre Habibe Hatun’dan bi’l-mürâca‘a taleb ederim deyü da‘vâ etdiğimde ol dahi cevâbında müdde‘î-i merkūm ile bundan akdemce kethudâ ve ustalar ma‘rifetleriyle hesâbımız rü’yet olunup mezbûrun zimmetinde bir senede terâküm eden gedik kirâsından kırk sekiz guruş mesârif-i mezkûresi’çün takas ve mahsûb olunduğundan gayrı zîrde müdde‘âsından dahi benimle elli yedi guruş bedel-i makbûza sulh olup mâ‘adâya ve bi’l-cümle husûs-ı mezkûra müte‘allika âmme-i da‘vâdan benim zimmetimi ibrâ ve iskāt ben dahi ibrâsını kabûl etmiş idim deyü eylediği def‘ini udûl-i Müslimînden Kethudâ İbrahim Usta b. Ahmed ve Yiğitbaşı Osman b. İbrahim ve İbrahim b. Bektaş ve Ahmed b. İbrahim ve Hasan b. Ahmed nâm kimesneler şehâdetleriyle bi’l-muvâcehe vech-i vecîh-i şer‘î üzere isbât etmeğin mûcebince müdde‘î-i merkūm Ahmed Beşe da‘vâ-yı mezkûresiyle mezbûre Habibe Hatun’a bî-vech mu‘ârazadan men‘ olunduğu İstanbul Mahkemesi’nden huzûr. Fî 19 Şa‘bân sene 1223.