İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 578 Hüküm no: 576 Orijinal metin no: [83b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cihangir mahallesi ahalisinin uygunsuz hareketlerinden dolayı mahalleden çıkarılmalarını talep etdikleri Mısırlı Mustafa ile karısı Hafize ve kayınvalidesi Ayşe ile sulh oldukları Ta‘zîrden ibrâ Ma‘rûz Mahrûse-i Galata muzâfâtından kasaba-i Tophâne’de Cihangir mahallesi imâmı vekîli es-Seyyid Ahmed Efendi ve ahâlisinden Fesci el-Hâc Mehmed Emin Ağa ve Duhânî Ahmed Ağa ve diğer Duhânî es-Seyyid Mustafa Ağa ve Hammâmî es-Seyyid el-Hâc Mehmed Efendi ve Barutcu İbarhim İbiş Ağa ve Tuzcu el-Hâc Hüseyin Ağa ve Hattât el-Hâc Ahmed Efendi ve Duhânî Mehmed ve Kömürcü el-Hâc Süleyman Çelebi ve Yağcı el-Hâc Abdurrahman Ağa ve Kürkcü el-Hâc İbrahim ve sâirleri meclis-i şer‘-i hatîrde mahalle-i mezbûre ahâlisinden sâhib-i arzuhâl Mısırlı el-Hâc Mustafa Ağa b. Mustafa muvâcehesinde mezbûr el-Hâc Mustafa Ağa ile zevcesi gāibetân ani’l-meclis Hafîze bt. Osman ve kayınvâlidesi Âişe bt. Mustafa nâm hatunlar mahallemiz sâkinlerinden olup bed-zebân ve hadîdetü’l-lisân olduklarına mebnî ahâli-i mahalle-i mezbûre ile bundan akdemce müşâcere ve münâza‘alarına binâen kasaba-i mezbûre mahkemesinde mezbûrûnu mahallemizden hurûclarına iltimâs etmişidik lâkin muslihûn tavassutuyla beynleri tevfîk ve ıslâh olunup fîmâ-ba‘d harekât-ı nâ-marzıyelerinden mübâ‘adet birle kendi hâllerinde ırzlarıyla mukayyed ve kâr u kisbleriyle meşgūller olup birbirlerine hilâf-ı şer‘-i şerîf itâle-i lisân ile ta‘cîz ve tekdîr etmemek üzere tarafeynden herbiri ta‘ahhüd ve hakk-ı ta‘zîre müte‘allika da‘vâdan herbiri âharı ibrâ ve iskāt ve herbiri âharın ibrâsını kabûlle külliyen kat‘-ı münâza‘a eyledikleri İstanbul Mahkemesi’nden tescîl ve huzûr. Fî 20 Ş sene [1]223.