İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 579 Hüküm no: 577 Orijinal metin no: [83b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ohan v. Melkon’un Davudpaşa Sarayı Ustası Mehmed Sadık Ağa’dan iki yıllığına kiraladığı francalacı fırın için peşin olarak verdiği meblağdan, tüm francalacı fırınlarının padişahın iradesiyle kapatılması üzerine, kalan on üç aylık kira ücretinden yedi yüz altmış beş kuruş alacağı olduğu Davudpaşa sahrâsında francalacı fırını Ma‘rûz Sâhib-i arzuhâl Ohan v. Melkon nâm zimmî meclis-i şer‘-i hatîrde derûn-ı arzuhâlde mezkûrü’l-ism Davudpaşa Sarayı Ustası Mehmed Sadık Ağa b. Hasan mahzarında mezbûr Mehmed Sadık Ağa mârrü’z-zikr Davudpaşa sahrâsında câmi‘-i şerîf tahtında kâin bir bâb francalacı fırınını bin iki yüz yirmi bir senesi Şevvâli’l-mükerremi gurresinden beher şehr ellişer guruş icâre tesmiyesiyle bana îcâr ve teslîm ben dahi ber-vech-i muharrer istîcâr ve tesellüm ve kabûl eylediğimden sonra icâre-i mezkûrenin şehriye beşer guruşunu Davudpaşa Ocağı mütevellîsine verilmek üzere bana emir ve havâle edip mâ‘adâ şehriye kırk beşer guruşdan iki senelik cem‘an bin seksen guruşu merkūm Mehmed Sadık Ağa ber-vech-i peşîn yedimden tamamen ahz ü kabz eyledikden sonra yedi ay mürûrunda bâ-irâde-i aliyye bi’l-cümle francalacı fırınları sedd ü bend olunduğu esnâda fırın-ı mezkûr dahi sedd ü bend olunmağla ben dahi ber-vech-i muharrer medfû‘um olan bin seksen guruşdan yedi aylık iktizâ eden üç yüz on beş guruşu lede’t-tenzîl bâkīsi olan yedi yüz altmış beş guruşu mezbûr Mehmed Sadık Ağa’dan istirdâd murâdımdır deyü da‘vâ etdikde ol dahi kaziyye minvâl-i meşrûh üzere olduğunu bi-tamamihâ tâyi‘an ve kat‘iyyen ikrâr ü i‘tirâf edip ancak fırın-ı mezkûr bâ-irâde-i aliyye sedd ü bend olunup ben sedd ü bend etmediğime mebnî makbûzum olan meblağ-ı mezbûru vermem demesi hilâf-ı şer‘-i şerîf olmağla iltifât olunmayıp alâ-mûcibi i‘tirâfihî meblağ-ı bâkī-i mezbûr yedi yüz altmış beş guruşu müdde‘î-i mesfûr Ohan zimmîye redd ü teslîme mezbûr Mehmed Sadık Ağa’ya tenbîh olunduğu İstanbul Mahkemesi’nden huzûr. Fî 18 Şa‘bân sene 1223.