İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 580 Hüküm no: 578 Orijinal metin no: [83b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haçador v. Ovannes’in Sarraf Anparson’da olan alacağını ödemesi için ortağı Sarraf Karabet aleyhine açtığı davasının meşru olmadığı Kumkapı’da francalacı fırını ve değirmeni Ma‘rûz Sâhib-i arzuhâl Haçador v. Ovannes zimmî meclis-i şer‘-i hatîrde derûn-ı arzuhâlde mastûrü’l-ism sarrâf tâifesinden Karabet v. Agop zimmî muvâcehesinde İstanbul’da Kumkapı hâricinde vâki‘ bir bâb francalacı fırını ve civârında kâin beş horoslu bir bâb uncu değirmeni derûnunda mevcûde yirmi re’s bârgir ve sâir âlât-ı lâzıme-i ma‘lûmenin üç sehm i‘tibârıyla bir sehmi benim ve birer sehmi şerîklerim gāib ani’l-meclis Ovannes ve İstefan nâm zimmîlerin Navul Kalemi’nde uhdelerimize kayd olunmuş olup fırın ve değirmen-i mezkûrun cânib-i mîrîye deyni olan dört bin guruş ve ma‘lûmü’l-esâmî kapan tüccârına yedi bin guruş ki cem‘an on bir bin guruş düyûnu kabûl eylediğimize mebnî ben ve şerîklerim mesfûrân mallarımızdan tüccâr-ı mezbûrûna deyn-i mezkûra mahsûben verilmek için beher mâh ikişer yüz ellişer guruşdan dokuz ayda mesfûr Karabet zimmînin şerîki Sarrâf Anparson zimmîye verdiğimiz cem‘an iki bin iki yüz elli guruşun bin iki yüz on altı guruşunu tüccâr-ı mezbûrûna verip mâ‘adâ bin yüz otuz dört guruşunu vermeksizin mesfûr Anparson zimmî vatan-ı aslîsi olan Eğin Kazâsı’na râhî olup ve işbu mesfûr Karabet gāib-i mesfûrun şerîki olduğuna binâen meblağ-ı merkūmu malından bize zâmin olsun deyü takrîr-i meşrûhu üzere mesfûr Karabet zimmîden eylediği da‘vâsı şer‘an mesmû‘a olmayıp meblağ-ı merkūmu gāib-i mesfûr Anparson zimmîden da‘vâ ve mutâlebe olunmağa muhtâc idiği kendiye tefhîm ve da‘vâ-yı mezkûresiyle mersûm Karabet zimmîye bî-vech mu‘ârazadan men‘ olunduğu İstanbul Mahkemesi’nden huzûr. Fî 10 Şa‘bân sene 1223.