İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 580 Hüküm no: 579 Orijinal metin no: [83b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maryem bt. Kasbar’ın sulh bedelinden kalan yüz yirmi beş kuruş alacağını hüseynîci esnafından Bogos v. Kerih’ten teslim alıp tarafların birbirlerinin zimmetlerini ibra ettikleri 125 guruş teslîm Ma‘rûz İstanbul’da Musalla kurbünde Şeyh Ferhad mahallesinde mütemekkine Maryem bt. Kasbar nâm Nasrâniye tarafından husûs-ı âtîde vekâleti şahsını bilir Kuyumcu Kirkor v. Kasbar ve Sarrâf Kirkor v. Aznavur zimmîler şehâdetleriyle sâbit olan Tütüncü Kasbar v. Agop nâm zimmî meclis-i şer‘-i hatîrde hüseyn[î]ci esnâfından sâhib-i arzuhâl Bogos v. Kerih nâm zimmî muvâcehesinde diğer Bogos v. Anbarsun zimmî hâzır olduğu hâlde işbu yedimde olan bir kıt‘a i‘lâm mantûkunca müvekkilem Nasrâniye-i mersûmenin mesfûr Hüseyin[î]ci Bogos zimmî zimmetinde bedel-i sulh-ı sahîhden üç yüz elli guruş alacak hakkı olmağla meblağ-ı merkūmun iki yüz yirmi beş guruşa müvekkilem Nasrâniye-i mersûmenin mesfûr Bogos zimmîden mukaddemâ beynlerinde cârî ahz ü i‘tâları’çün ilzâm-ı ribh olunmadan murâbaha nâmıyla bi-gayrı hakkın makbûzu olan iki yüz yirmi beş guruşu takasan [84a] tenzîl olunmağla ol-vechile bâkīsi olan yüz yirmi beş guruşu hâzır-ı mesfûr diğer Bogos zimmî yediyle işbu meclis-i şer‘de müvekkilem mesfûre için bana def‘ ü teslîm ben dahi bi’l-vekâle ahz ü kabz eyledim fîmâ-ba‘d müvekkilem mesfûrenin ve gerek benim mersûm Bogos zimmetinde onun dahi kezâlik benimle müvekkile-i mesfûre zimmetinde meblağ-ı mezbûrdan ve husûs-ı sâireden bir akçe ve bir habbe hakkımız ve alacağımız kalmamağla bi’l-cümle hukūk-ı şer‘iyeye müte‘allika âmme-i de‘âvîden herbirimiz bi’l-asâle ve bi’l-vekâle âharın zimmetini ibrâ ve iskāt ve herbirimiz ber-vech-i muharrer âharın ibrâsını kabûlle külliyen kat‘-ı münâza‘a ve hasm-ı husûmet eyledik deyü ikrâr ve tasdîkleri İstanbul Mahkemesi’nde tescîl ve huzûr. Fî 20 Şa‘bân sene 1223.