İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 581 Hüküm no: 580 Orijinal metin no: [84a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Berber Ömer Alemdar’ın, mütevellinin izniyle kiracısı olduğu yanmış berber dükkânının arsasından bir miktarının bitişiğindeki Bakkal Foti’ye devredildikten sonra tekrar berber dükkânına iadesini talep etmesinin meşru olmadığı Kırkdört Kapısı’nda berber gediği Ma‘rûz Berber esnâfından Ömer Alemdâr b. Ahmed meclis-i şer‘-i hatîrde bakkāl tâifesinden Foti v. Dimitri nâm zimmî muvâcehesinde İstanbul’da Kırkdört Kapısı kurbünde Kādıasker Hamamı civârında vâki‘ müsteciren sâkin ve gediğine mâlik olduğum berber dükkânı ve ittisâlinde zimmî-i mesfûrun bakkāl dükkânı bundan akdem bi-kazâillâhi te‘âlâ vukū‘ bulan harîkde muhterik oldukda dekâkin-i mezkûrenin mutasarrıfı el-Hâc Osman nâm kimesne zikr olunan berber dükkânı arsasından arzen iki zirâ‘ altı parmak mahâllini sâlifü’z-zikr bakkāl dükkânı arsasına zam ve ilhâk birle arsa-i mezkûreyi bâ-re’y-i mütevellî zimmî-i mesfûra ferâğ ve kasr-ı yed edip ve zikr olunan berber dükkânı binâ olundukda dîk olmağla mesfûr Foti zimmî ol-mikdâr arsayı bana ferâğ eylesin deyü takrîr-i meşrûhu üzere tasaddî eylediği da‘vâsı şer‘an mesmû‘a olmayıp husûs-ı merkūmda zimmî-i mesfûra şer‘an cebr iktizâ etmemekle müdde‘î-i merkūmun mu‘ârazası bî-vech olduğu İstanbul Mahkemesi’nden huzûr. Fî 12 Şa‘bân sene 1223.