İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 582 Hüküm no: 581 Orijinal metin no: [84a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Numan Ağa’nın kayınpederi Musa Bey’den altı yüz kuruş alacağı olduğu 600 guruş hüküm Ma‘rûz Sâhib-i arzuhâl Numan Ağa b. Hüseyin meclis-i şer‘-i münîrde kayınpederi derûn-ı arzuhâlde mezkûrü’l-ism Musa Bey b. Halil mahzarında işbu sene-i mübâreke Rebî‘ulûlâ gurresinde malımdan altı yüz guruş kayınpederim mezbûra ikrâz ve teslîm ol dahi yedimden iktirâz ve kabz ve istihlâk edip hattâ meblağ-ı mezbûr zimmetinde cihet-i mezkûreden bana deyni olduğunu kat‘iyyen ikrâr ve deyn-i mezkûrunu nâtık mümzâ ve mahtûm ve mu‘anven ve mersûm işbu bir kıt‘a temessükü yedime i‘tâ etmekle hâlâ meblağ-ı mezbûru mezbûr Musa Bey’den taleb ederim deyü ba‘de’d-da‘vâ ve’l-inkâr müdde‘î-i merkūm ber-vehc-i muharrer müdde‘âsını mahâllinde lede’t-tezkiye adl ve makbûlü’ş-şehâde idikleri ihbâr olunan Buhûrdânî İsmail Ağa b. Süleyman ve Ali Ağa b. Osman nâm kimesneler şehâdetleriyle mîr-i mezbûr muvâcehesinde vech-i vecîh-i şer‘î üzere isbât etmeğin mûcebince meblağ-ı merkūm altı yüz guruşu müdde‘î-i merkūm Numan Ağa’ya edâ ve teslîme mezbûr Musa Bey’e tenbîh olunduğu İstanbul Mahkemesi’nden huzûr. Fî 20 Şa‘bân sene 1223.