İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 582 Hüküm no: 582 Orijinal metin no: [84a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Edhem Efendi’nin Kahveci Mustafa Beşe’den borç olarak verdiği paradan yüz on kuruş alacağı olduğu 110 guruş hüküm Ma‘rûz İbrahim Edhem Efendi b. Mehmed Emin meclis-i şer‘-i münîrde Kahveci Mustafa Beşe b. Mustafa muvâcehesinde merkūm Kahveci Mustafa Beşe zimmetinde bundan akdem malımdan ve yedimden iktirâz ve kabz eylediği yüz elli guruşun kırk guruşunu mezbûra dakīk-i hâs ve mest ve papuş ve sabun semenlerinden zimmetimde deynim olan kırk guruşa takasan ba‘de’t-tenzîl bâkīsi olan yüz on guruşu merkūm Mustafa Beşe’den hâlâ taleb ederim deyü da‘vâ etdikde ol dahi cevâbında benim müdde‘î-i mezbûr zimmetinde meblağ-ı merkūm kırk guruşdan mâ‘adâ binişlik çuka ve İstanbul şalîsi ve çuka çakşır ve kömür semenlerinden üç yüz seksen bir guruş ki cem‘an dört yüz yirmi bir guruş alacağım olmağla meblağ-ı merkūm yüz elli guruşu deyn-i mezkûrunun ol-mikdârına mahsûben kabz etmemle mâ‘adâsı olan iki yüz yetmiş bir guruşu mezbûr İbrahim Edhem Efendi’den taleb ederim deyü eylediği da‘vâsına ikāmet-i beyyineden izhâr-ı acz ve tahlîfe dahi tâlib olmamağla merkūm Mustafa Beşe da‘vâ-yı mezkûresiyle bilâ-beyyine mu‘ârazadan ba‘de’l-men‘ sâlifü’l-beyân ikrâr ü i‘tirâfı üzere makbûzu olan yüz elli guruşdan kırk guruşu deyn-i mezkûra mahsûben ba‘de’t-tenzîl bâkīsi olan yüz on guruşu müdde‘î-i merkūm İbrahim Edhem Efendi’ye edâsıyla Mustafa Beşe’ye tenbîh olunduğu İstanbul Mahkemesi’nden huzûr. Fî 20 Şa‘bân sene 1223.