İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 583 Hüküm no: 583 Orijinal metin no: [84a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eyüp’te Kızılmescit adlı mahalde bir adet francalacı fırını açılmasına izin verilmesi Francalacı fırını küşâdı Ma‘rûz Sâdır olan fermân-ı âlîlerine imtisâlen işbu arzuhâl ve derkenâra nazar olundukda İstanbul ve havâlîsinde mahâll-i ma‘lûmede yedi aded francalacı fırınları ibkā ve mâ‘adâsı bâ-irâde-i aliyye sedd ü bend olunduğu derkenârdan müstebân iken bundan akdemce vâlid-i mâcid-i hazret-i şehriyârî cennet-mekân firdevs-âşiyân Sultan Abdülhamid Han -aleyhi’r-rahmetü ve’l-gufrân- hazretlerinin Beylerbeyi ve Mîrgünoğlu nâm mahallerde müceddeden ihyâsına muvaffak oldukları cevâmi‘-i şerîfe ve âsâr-ı celîleleri evkāfından mahalleyn-i merkūmeynde iki aded ve Gümrükcü Çiftliği’nde bir aded ve Çelebi Hasan Paşa Vakfı’ndan Kumkapı hâricinde bir aded ve kethudâ-yı hazret-i sadr-ı âlî-i esbak merhûm İbrahim Efendi mahdûmunun Tavukpazarı nâm mahâlde bir aded ve Beykoz civârında Kâğıdhâne nâm mahâlde bir aded ve İstanbul Şehremîni nâm mahâlde bir aded ve Hudâvendigār-ı esbak cennet-mekân firdevs-âşiyân Sultan Selim Han hazretlerinin vâlideleri merhûme Mihrişah Vâlide Sultan -tâbe serâhâ- vakfı musakkafâtından Hasköy’de Humbarahâne Kışlası civârında bir aded ki cem‘an sekiz aded francalacı fırınlarının küşâdı ile on beş adede iblâğı husûsuna irâde-i aliyye ta‘alluk eylediğine mebnî şeref-yâfte-i sudûr olan fermân-ı âlî-şân mûcebince küşâdlarına ruhsat verilmiş olup ve işbu küşâdı istid‘â olunan Eyüb-i Ensârî’de Kızılmescid nâm mahâlde kâin francalacı fırını dahi mukaddemâ bâ-irâde-i aliyye mesdûd olan fırınlara dâhil olup lâkin fırın-ı merkūm mutasarrıfları sâhib-i arzuhâl şâyân-ı inâyet olmağla zikr olunan fırının merhameten küşâdı husûsu re’y-i rezîn-i âsafanelerine menût olduğu İstanbul Mahkemesi’nden huzûr. Fî 22 Şa‘bân sene 1223.