İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 585 Hüküm no: 585 Orijinal metin no: [84b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Râif Efendi’nin tasarrufunda olan dükkânını kiracısı Çubukçu Mehmed Ali’nin ölmesi üzerine oğlu Çubukçu Halil’e aylık yedişer kuruş ücretle kiraya verdiği Galata’da dükkân gediği Ma‘rûz Mehmed Râif Efendi b. Ali nâm kimesne Çarşamba günü arz odasında huzûr-ı hazret-i sadâret-penâhîde ma‘kūd meclis-i şer‘-i münîrde çubukçu esnâfından es-Seyyid Halil b. Mehmed [Ali] muvâcehesinde mahrûse-i Galata’da Karakö[y] Kapısı dâhilinde helvacı dükkânı karşısında kâin bi’l-icâreteyn mutasarrıf olduğum bir bâb dükkânda mezbûr es-Seyyid Halil’in babası Çubukcu Mehmed Ali hayatında müşâhereten müstecir olup fevt oldukda icâre münfesiha olmağla dükkân-ı mezkûru ben zabt ü tasarruf ve âhara îcâr irâdesinde olduğumda mezbûr es-Seyyid Halil dükkân-ı mezkûrun gediği babam müteveffâ-yı mezbûrdan mevrûs mülküm olup hâmiş-i arzuhâlde mastûr derkenâr mantûkunca çubukçu esnâfının gedikleri Başmuhâsebe’de topdan mukayyed ve mu‘teber olup Galata’da altı bâb dükkân deyü musarrah ve dükkân-ı mezkûr gediği zikr olunan altı bâb dükkânda dâhil olmağla kadîmî kirâsıyla bana îcâr olunması murâdımdır deyü nizâ‘a tasaddî ve fi’l-hakīka zikr olunan altı bâb dükkânda dâhil olduğu esnâf-ı merkūme kethudâsı ve sâir mazbûtü’l-esâmî Müslim ustaları ihbârlarıyla mütehakkık olduğundan mâ‘adâ bâ-vesâtet-i muslihîn beynimiz tevfîk ve ıslâh olunup ben dükkân-ı mezkûru işbu târih-i i‘lâmdan beher şehr yedişer guruş icâre tesmiyesiyle merkūm es-Seyyid Halil’e îcâr ve teslîm eylediğimde ol dahi ber-vech-i muharrer istîcâr ve tesellüm ve kabûl edip mâh be-mâh icâre-i mezkûresini cevr ü ezâ etmeksizin bana edâya müte‘ahhid ve bu vechile kat‘-ı münâza‘a eyledik deyü ikrâr ve tasdîkleri İstanbul Mahkemesi’nden huzûr. Fî 15 Şa‘bân sene 1223.