İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 586 Hüküm no: 586 Orijinal metin no: [84b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İncirli Çiftliği’ne mahsus bir adet has ekmekçi fırını açılmasına izin verilmesi Francalacı fırını Ma‘rûz Sâdır olan fermân-ı âlîlerine imtisâlen işbu takrîr ve derkenâra nazar olundukda İstanbul ve havâlîsinde mahâll-i ma‘lûmede yedi aded francalacı fırınları ibkā ve mâ‘adâsı bâ-irâde-i aliyye sedd ü bend olunduğu derkenârdan müstebân iken bundan akdemce vâlid-i mâcid-i hazret-i şehriyârî cennet-mekân firdevs-âşiyân Sultan Abdülhamid Han -aleyhi’r-rahmetü ve’l-gufrân- hazretlerinin Beylerbeyi ve Mîrgünoğlu nâm mahallerde müceddeden ihyâsına muvaffak oldukları cevâmi‘-i şerîfe ve âsâr-ı celîleleri evkāfından mahalleyn-i merkūmeynde iki aded ve Gümrükcü Çiftliği’nde bir aded ve Çelebi Hasan Paşa Vakfı’ndan Kumkapı hâricinde bir aded ve kethudâ-yı sadr-ı âlî-i esbak merhûm İbrahim Efendi mahdûmunun Tavukpazarı nâm mahâlde bir aded ve Beykoz civârında Kâğıdhâne nâm mahâlde bir aded ve İstanbul’da Şehremîni nâm mahâlde bir aded ve Hudâvendigār-ı esbak cennet-mekân firdevs-âşiyân Sultan Selim Han hazretlerinin vâlideleri merhûme Mihrişah Vâlide Sultan -tâbe serâhâ- vakfı müsakkafâtından Hasköy’de Humbaracı Kışlası civârında bir aded ve Eyüb-i Ensârî’de Kızılmescid nâm mahâlde bir aded cem‘an dokuz aded francalacı fırınlarının küşâdıyla on altı adede iblâğı husûsuna irâde-i aliyye ta‘alluk eylediğine mebnî şeref-yâfte-i sudûr olan evâmir-i aliyye mûceblerince küşâdlarına ruhsat verilmiş olup ve işbu küşâdı istid‘â olunan İncirli Çiftliği’nde kâin hâss etmek fırını dahi mukaddemâ bâ-irâde-i aliyye mesdûd olan fırınlara dâhil olup emsâline kıyâsen küşâdını istid‘â zımnında Bâb-ı Âlî’ye takdîm olunan işbu takrîr bâlâsına zikr olunan fırın francalacı fırını olmayıp çiftliğe mahsûs hâs etmekci fırını olduğu kuyûdâtdan müstebân olmağla zikr olunan fırını küşâd etdirdesiz deyü bu dâ‘îlerine hitâben şeref-yâfte-i sudûr olan fermân-ı âlîlerine imtisâlen fırın-ı mezkûrun küşâdı iktizâ eylediği İstanbul Mahkemesi’ndnen huzûr. Fî 23 Şa‘bân sene 1223.