İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 78 Hüküm no: 19 Orijinal metin no: [5b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdar’da Selimiye Camii Vakfı tarafından Foti v. Zafiri’ye kiralanan francalacı fırını ve gediğine ekmekçi esnafı vs.nin müdahale ettirilmemesi Üsküdar’da Selimiye Câmi‘-i şerîfi müsakkafâtından müceddeden francalacı gediği fermânı. Akzâ kuzâtü’l-Müslimîn, evlâ vülâti’l-muvahhidîn, ma‘denü’l-fezâili ve’l-yakīn, râfi‘û a‘lâmi’ş-şerî‘ati ve’d-dîn, vârisû ulûmü’l-enbiyâi ve’l-mürselîn, el-muhtassûne bi-mezîd-i inâyeti’l-Meliki’l-mu‘în İstanbul ve Üsküdar ve Galata ve Eyüp kādıları -zîdet fezâilühüm- ve kıdvetü’l-ulemâi’l-muhakkıkīn, umdetü’l-fudalâi’l-müdakkıkīn Haremeynü’ş-şerîfeyn Müfettişi Mevlânâ ( ) -zîde ilmühû- ve iftihârü’l-emâcid ve’l-ekârim, câmi‘ü’l-mahâmid ve’l-mekârim, el-muhtassu bi-mezîd-i inâyeti’l-Meliki’d-dâim Hadîka-i hâssam Bostancıbaşısı ( ) -dâme mecduhû- tevkī‘-i refî‘-i hümâyûn vâsıl olucak ma‘lûm ola ki Seyyidetü’l-muhadderât, iklîletü’l-muhassenât, tâcü’l-mestûrât, safiyyetü’s-sıfât, refî‘atü’d-derecât, zâtü’l-alâ ve’s-sa‘âdât Vâlidem Sultân -dâmet ismetühâ ve zâdet iffetuhâ-nın Kethudâları iftihârü’l-ümerâi ve’l-ekâbir Yusuf -dâme ulüvvuhû-nun takdîm eylediği takrîri mefhûmunda medîne-i Üsküdar’da müceddeden binâ ve inşâsına irâde-i kātı‘a-i mülûkânem ta‘alluk eden Selimiye ismiyle müsemmâ Câmi‘-i şerîf ve meberrât-ı sâire-i hümâyûnumun evkāfı müsakkafâtına şeref-yâfte-i sudûr olan hatt-ı hümâyûn-ı şevket-makrûnum mûcebince cemî‘ selâtîn-i izâm evkāfı misillü her bir esnâf gediklerinden birer ve ikişer esnâf gedikleri ilhâk ve ihdâs olunması meşrût olmakdan nâşî Vakf-ı hümâyûnum müsakkafâtından sâlifü’z-zikr Selimiye arâzîsinde francala ve alîl ve marîz için <> vakıyyelik nân-ı azîz tabh ve i‘mâl için müceddeden francalacı fırını gediği binâ ve ihdâs ve fırın-ı mezkûrda tabh olunan nân-ı hâss-ı francala ve vakıyyelik nân-ı hâssu’l-hâs Âsitâne-i aliyyemde ve Galata ve Üsküdar ve Eyüp ve diledikleri tarafda kifâyet mikdârı küfecilerin füruhtuna kimesne tarafından vechen mine’l-vücûh müdâhale olunmamak ve habbâzînin tabh edeceği nân-ı azîzin dakīkını arâzî-i mezkûrede Vakf-ı hümâyûnum müsakkafâtından binâ olunan değirmenden ve sâir dilediği mahallerden mübâya‘a eylemek üzere ma‘lûmü’l-mikdâr icâre-i mu‘accele ve müeccele [6a] ile Foti v. Zafiri yedine cânib-i Vakf-ı hümâyûnumdan temessük i‘tâ olunmağla fırın-ı mezkûrda tabh edeceği francala ve vakıyyelik nân-ı azîzin füruhtuna esnâfları ve sâirleri taraflarından, bizim gediğimiz ziyâde olmaz; nizâmımız vardır, diyerek yâhûd cihet-i âhar ile bir vechile te‘addî ettirilmemek ve eğer ederi olur ise men‘ u def‘ ve mütenebbih olmayanlar tedîb olunmak üzere emr-i âlî-şânım ve cânib-i Vakf-ı şerîf-i hümâyûnuma ilmühaberi i‘tâ olunmasını inhâ etmekle takrîri mûcebince Evkāf-ı hümâyûn-ı cihân-dârânem tarafına ilmühaberi verilmekle imdi vech-i meşrûh üzere amel olunmak bâbında fermân-ı âlî-şânım sâdır olmuşdur. Buyurdum ki: Hükm-i şerîfim vardıkda bu bâbda vech-i meşrûh üzere Ağa-yı müşârün-ileyhin takrîri mûcebince şeref-yâfte-i sudûr olan işbu emr-i âlî-şânımın mazmûn-ı münîfi birle âmil olup hilâf-ı emr-i âlî-şânım habbâz esnâfı ve sâirleri taraflarından bir vechile te‘addî ve rencîde ettirmeyip ve eğer ederi olur ise men‘ u def‘ eyleyesiz. Şöyle bilesiz alâmet-i şerîfe i‘timâd kılasız. Fî 9 Rebî‘ülâhire sene [1]217 Mahrûse-i Kostantıniyye