İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 81 Hüküm no: 21 Orijinal metin no: [6b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ramazan ayının yaklaşması münasebetiyle, İstanbul’daki çörekçi esnafına kaliteli çörek imal etmeleri hususunda tembihte bulunulması İstanbul Kādısı Fazîletlü Efendi Çörekci esnâfı i‘mâl eyledikleri çöreklerin bir müddetden beri kerestesine ve yağına ihtimâm etmediklerinden ekle gayr-ı sâlih derecelerine resîde olduğu bedîhiyâtdan ve el-hâletü hâzihî Ramazan-ı gufrân-nişânın takarrubu hasebiyle ibâdullâha hâs çörek füruhtu için bu maddeye dikkat ve ihtimâm olunmak vâcibeden olmağla imdi esnâf-ı mezkûreyi ihzâr edip fîmâ-ba‘d i‘mâl eyledikleri çöreği be-gāyet hâs ve yağı nisâbında ve gāyet a‘lâ revgan-ı sâde ile i‘mâl eylemeleri husûsunu bir kavî nizâma rabt ile mugāyir-i nizâm ü tenbîh harekete ictisâr olunmak ve izâfe eyledikleri revgan çerviş olmak lâzım gelir ise bilâ-imhâl tedîbât-ı şedîdeleri icrâsın[d]a dakīka fevt olunmayacağını iktizâ edenlerin gûş-ı hûşlarına gereği gibi ilkā ve te’kîde mübâderet ve siz dahi dâimâ nezâret ve sûret-i nizâmını huzûrumuza i‘lâma müsâra‘at eyleyesiz deyü buyruldu. Fî 20 Ş sene [1]217