İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 81 Hüküm no: 22 Orijinal metin no: [6b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rozen isimli Yahudi tacirin borçlarının, tek seferde ödeyemeyeceği hukuken sabit olur ise taksitlendirilmesi Taksît-ı deyn fermânı. Akzâ kuzâtü’l-Müslimîn, evlâ vülâti’l-muvahhidîn, ma‘denü’l-fazli ve’l-yakīn, râfi‘u a‘lâmi’ş-şerî‘ati ve’d-dîn, vârisü ulûmü’l-enbiyâi ve’l-mürselîn, el-muhtassu bi-mezîd-i inâyeti’l-Meliki’l-mu‘în Mevlânâ İstanbul Kādısı -zîdet fezâilühü- tevkī‘-i refî‘-i hümâyûn vâsıl olucak ma‘lûm ola ki Ruvesen nâm Yahûdî Dîvân-ı Hümâyûn’uma arzuhâl edip; mersûm Bedesten tüccâr tâifesinden olup İstanbul sâkinlerinden ma‘lûmü’l-esâmî on iki nefer tüccârâna ber-mûceb-i temessük yirmi altı bin yirmi guruş deyni olmakdan nâşî def‘aten edâ-yı deyne kudreti olmamağla taksît-ı şer‘î ile edâ-yı deyn ettirilmek için emr-i şerîfim sudûrunu istid‘â-yı inâyet eylediği ecilden Hazîne-i âmirem defterlerine mürâca‘at olundukda bu makūle ashâb-ı düyûnun def‘aten edâ-yı deyne adem-i kudreti şer‘an sâbit oldukda taksît-ı şer‘î ile edâ-yı deyn ettirilmek için ber-mûceb-i şurût evâmir-i şerîfem verilegeldiği Mâliye’den derkenâr olunmağla imdi şurûtu mûcebince amel olunmak bâbında fermân-ı âlî-şânım sâdır olmuşdur. Buyurdum ki: Hükm-i şerîfim vardıkda bu bâbda sâdır olan emrim üzere amel edip dahi göresin: Yahûdî-i mersûm deynini def‘aten edâya kudreti olmadığı şer‘an sâbit olur ise ber-mûceb-i şurût taksît-ı şer‘î ile edâ-yı deyn ettirtip hilâf-ı şer‘-i şerîf rencîde ve te‘addî ettirmeyesin. Şöyle bilesin alâmet-i şerîfeme i‘timâd kılasın. Fî 14 [min]-şehri Ramazan sene [1]217 Mahrûse-i Kostantıniyye