İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 86 Hüküm no: 26 Orijinal metin no: [8a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Galata Yağ Kapanı Nazırlığına Arabzâde Hacı Ahmed’in tayin edildiği Fermân-ı Nâzır-ı Kapan-ı Revgan. Akzâ kuzâtü’l-Müslimîn, evlâ vülâti’l-muvahhidîn, ma‘denü’l-fazli ve’l-yakīn, râfi‘u a‘lâmi’ş-şerî‘ati ve’d-dîn, vârisü ulûmü’l-enbiyâi ve’l-mürselîn, el-muhtassu bi-mezîd-i inâyeti’l-Meliki’l-mu‘în Mevlânâ İstanbul Kādısı -zîdet fezâilühû- tevkī‘-i refî‘-i hümâyûn vâsıl olucak ma‘lûm ola ki Memleket-i Boğdan’dan envâ‘-ı revgan ve ecnâs-i zehâir getiren Galata Yağ Kapanı tüccârının vürûd eden don ve çerviş yağlarının hıfz u hırâsetine i‘âne için Kapan-ı mezkûra sâbıkā nâzır ta‘yîn olunup bundan <> akdemce azlolunan Arabzâde el-Hâc Ahmed nâm kimesne bu def‘a nâzır nasb olunmasını istid‘â eylediği beyânıyla sudûr eden fermân-ı âlî-şânıma imtisâlen Kapan-ı mezkûr nâzırı olan es-Seyyid Veliyüddin hasbe’l-iktizâ azlolunup yerine kemâl-i sadâkat ve istikāmetle nezâret ve hizmet-i lâzımesini kemâ-yenbagī rü’yet edip bi’l-cümle vürûd eden don ve çerviş yağlarının bir dirhemi bilâ-emir mahâll-i âhara sarf olunmasına iğmâz-ı ayn [8b] ve müsâmaha ile hıyânet etmemek şartıyla mezbûr el-Hâc Ahmed nâzır nasb u ta‘yîn olunduğunu hâvî yedine bir kıt‘a emr-i şerîfim i‘tâsını sen ki mevlânâ-yı mûmâ-ileyh Süleyman -zîdet fezâilühû-sun, i‘lâm etmenle i‘lâmın mûcebince amel olunmak fermânım olmağın imdi ber-vech-i meşrûh Der-aliyye’me vürûd eden don ve çerviş yağlarının bir dirhemi bilâ-fermân mahâll-i âhara sarf olunmasına iğmâz-ı ayn ve müsâmaha ile hıyânet etmemek <<üzere>> şartıyla merkūm el-Hâc Ahmed nâzır nasb u ta‘yîn olunduğu ma‘lûmun oldukda ber-vech-i muharrer amel ve hareket olunmak ve hilâf-ı fermân hâlât tecvîz olunmamak bâbında fermân-ı âlî-şânım sâdır olmuşdur. Buyurdum ki: Hükm-i şerîfim vusûl buldukda bu bâbda vech-i meşrûh üzere şeref-yâfte-i sudûr olan fermân-ı vâcibü’l-ittibâ‘ ve lâzımü’l-imtisâlimin mazmûn-ı itâ‘at-makrûnuyla amel ve hareket ve hilâfından be-gāyet tehâşî ve mücânebet eyleyesin. Şöyle bilesin alâmet-i şerîfeme i‘timâd kılasın. Fi’l-evâhiri şehri Şevvali’l-mükerrem sene [1]217 Kostantıniyyeti’l-mahrûse