İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 88 Hüküm no: 28 Orijinal metin no: [9a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yangınlara karşı tedbir olmak üzere, İstanbul ve civarında yeni yapılacak binaların dış tarafında ahşap kullanılmaması ve emirde belirtilen diğer hususlara uyulması Bâ-sahh-ı âlî. İstanbul Kādısı Fazîletlü Efendi Âsitâne-i sa‘âdet ve havâlîsinde ma‘âza’llâhi te‘âlâ aralıkda zuhûr eden harîklerin avn ü tevfîk-ı hazret-i Hayrü’l-hâfızîn’a ittikāen def‘-i esbâb-ı zâhiriyyesine dikkat sıyânet-i ibâdullâh ferâizından olarak lâzıme-i zimmet ve öteden beri bu husûslara mülâhazât-ı lâzıme ile memnû‘ât tebyîn olmuş iken ri‘âyet olunmadığından esbâb-ı merkūme tekessür etmiş idiği bedîhî bir hâlet olmakdan nâşî fîmâ-ba‘d bu bâbda gereği gibi dikkat olunup hilâfı hareket edenlerin haklarından gelinmesine irâde-i seniyye müte‘allik olduğundan fîmâ-ba‘d binâ ve inşâ olunan ebniyenin taşra cevânibinden hiçbir tarafına tahta kaplanmayıp mu‘tâd üzere sıva olmak ve göbek şehnişîni yapılmayıp cunba çıkmamak ve saçakları dahi sıvama kirpi saçak olmak ve mahâll-i ebniyenin hudûd-ı mu‘ayyene-i kadîmesinden ziyâde caddeden bir şibr yer alınmamak husûslarına nezâret ve bunun mugāyiri inşâsına cesâret edenler her kim olur ise olsun tedîb olunmak için ihbâr ve ifâdeye mübâderet eylemesi bâbında bu def‘a Mi‘mâr Ağa’ya hitâben beyâz üzerine emr-i âlî ısdâr olunmağla imdi siz dahi bi’l-cümle mahallât imâmlarını celb ve her kim bu maddeye cesâret edip hilâf-ı emr ü tenbîh hâlâta ibtidâr eder ise icrâ-yı tedîblerine müsâra‘at olunacağını herkes kendi mahallesi ahâlîsine ifâde ve mütenebbih olmayıp yine fermân-ı âlînin hilâfı ebniye inşâsına mübâderet ederi olur ise ihbâr eylemelerini gereği gibi tenbîh ve te’kîde müsâra‘at ve haber vermeyen imâmlar dahi haber vermediği için tedîb olunacaklarını gûş-ı hûşlarına telkīne mübâderet eyleyesiz deyü buyruldu. Fî 14 min-Z sene [1]217