İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 99 Hüküm no: 35 Orijinal metin no: [12a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Galata Sarayı civarındaki Evkaf-ı hümayun Mumhanesi’nin yağ tahsisatının bir hisse artırıldığı Mumhâne-i hümâyûn-ı cedîde bir hisse revgan zammı. Mumhâne. Akzâ kuzâtü’l-Müslimîn, evlâ vülâti’l-muvahhidîn, ma‘denü’l-fazli ve’l-yakīn, râfi‘u a‘lâmi’ş-şerî‘ati ve’d-dîn, vârisü ulûmü’l-enbiyâi ve’l-mürselîn, el-muhtassu bi-mezîd-i inâyeti’l-Meliki’l-mu‘în Mevlânâ İstanbul Kādısı -zîdet fezâilühû- ve kıdvetü’l-ulemâi’l-muhakkıkīn, umdetü’l-fudalâi’l-müdakkıkīn Haremeyn-i şerîfeyn Müfettişi Mevlânâ ( ) -zîde ilmühû- tevkī‘-i refî‘-i hümâyûn vâsıl olucak ma‘lûm ola ki Evkāf-ı hümâyûnum müsakkafâtından Galata Sarayı civârında müceddeden binâ olunan bir bâb Mumhâne’nin revganı bâ-emr-i âlî-şân yüz on sekiz hisseden bir hissesi olup bir hisse ile bir türlü idâresi mümkün olamayıp bir hisse dahi zamma muhtâc olduğun müste’ciri Mihalaki nâm zimmî bâ-arzuhâl istid‘â-yı inâyet [12b] etmekle kuyûdâta mürâca‘at olundukda mahâll-i merkūmda kâin evkāf-ı hümâyûnumdan müceddeden binâ olunan bir bâb Mumhâne’nin revganı ber-mûceb-i emr-i âlî-şân yüz on sekiz hisse i‘tibârıyla tanzîm ve mumhâne esnâfına Yağ Kapanı tarafından verilen hisseye bir hisse i‘tibârıyla ilhâk ve tevzî‘de idhâl ve tevzî‘ için ihrâc olunan işkenbe ve don yağının a‘lâsı Mumhâne-i mezbûreye ta‘yîn olunması için bundan akdem bin iki yüz on yedi senesi Muharrem’inde nizâmlarını hâvî bâ-i‘lâm sâdır olan emr-i âlî-şân ba‘de’d-derkenâr husûs-ı mezbûr fermân-ı âlî-şânımla İstanbul Kādısı’na havâle olundukda Vakf-ı hümâyûnum îrâdından Galata Sarayı kurbünde kâin Şem‘hâne’yi is[t]îcâr eden Mihalaki ve Kostaki nâm zimmîlerin mukaddemâ istid‘âlarıyla i‘tâ olunan fermân-ı âlî-şân müfâdınca Mumhâne-i mezkûrede şişe ve kālıb mumu i‘mâl ve ibâdullâha bey‘ olunmak için mumcu esnâfının müretteb olan yüz on sekiz sehimleri üzerine bir sehim zam ve yüz on dokuz sehme iblâğ ile mumcu esnâfına Kapan’dan tevzî‘ için ihrâc olunan işkenbe ve don yağlarının a‘lâsı Mumhâne-i merkūmeye ta‘yîn olunmuş olup el-yevm verilegeldiği ve bu def‘a dahi mumcu-i mesfûr Mihalaki zimmînin takdîm eylediği arzuhâli bâlâsına Vakf-ı hümâyûnum Mumhânesi’ne bir hisse kifâyet eylemeyip bir hisse dahi zammolunmak bâbında sâdır olan fermân-ı âlî-şânım mûcebince mumcu esnâfının beynlerinde müretteb olan yüz on dokuz sehimleri üzerine bir sehim dahi tekrar zammile Vakf-ı hümâyûnum Mumhânesi’ne iki hisse ta‘yîn ve tahsîs ve ol vechile yüz yirmi sehme iblâğ olunmağla mâh be-mâh mumcu esnâfına Kapan’dan tevzî‘ için ihrâc olunan işkenbe ve don yağlarının a‘lâsı olarak Mumhâne-i mezkûreye vech-i meşrûh üzere iki sehim hisse i‘tâsı iktizâ eylediğini sen ki Mevlânâ-yı mûmâ-ileyh İbrahim Selim -zîdet fezâilühû-sun, i‘lâm eylediğin ecilden i‘lâmın mûcebince gurre-i Safer’den i‘tibâr ile Mumhâne-i mezkûra mâhiye ikişer sehim zammolunmağla imdi vech-i meşrûh üzere amel olunmak bâbında fermân-ı âlî-şânım sâdır olmuşdur. Buyurdum ki: Hükm-i şerîfim vardıkda bu bâbda i‘lâmın mûcebince şeref-yâfte-i sudûr olan işbu emr-i şerîf-i âlî-şânımın mazmûn-ı münîfi üzere âmil olasın ve sen ki Müfettiş-i mûmâ-ileyhsin, sen dahi mûceb-i emr-i şerîfimle amel ve hareket eyleyesin. Şöyle bilesin alâmet-i şerîfe i‘timâd kılasın. Fî 7 min-S sene [1]218 Kostantıniyye-i mahrûse