İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 101 Hüküm no: 37 Orijinal metin no: [13a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bazı hamamcıların gemilerle odun getirtip haksız rekabete yol açmalarını önlemek için, gelen odunun kimseye fazladan aldırılmadan hamamcılar arasında bölüştürülmesi Hammâmcılara dâir hatab fermânı. İstanbul Kādısı Fazîletlü Efendi Der-aliyye’de vâki‘ hammâmcı esnâfından üç beş nefer kimesne ihtikâr kasdıyla biner, bin beşer yüz guruşa birer ikişer kıt‘a sefîne istîcâr ve hammâmlarına tahsîs ile sefâin-i mezkûre vürûd ettikçe, bizim kayığımız geldi, deyü gûyâ bir nizâm misillü beşer onar çeki hatab sâir hammâmcılara verip mâ‘adâsını kendileri ahz ü iddihâr etmekde oldukları bu def‘a ihbâr ve tahkīk olunup ancak bu keyfiyet sâir hammâmcılara gadri mûcib bir hâlet olduğundan başka ihtikâr maddesine dahi bir vechile rızâ-yı âlî olmamağla imdi fîmâ-ba‘d vürûd eden kayıklar her kimin olur ise olsun vech-i lâyıkı üzere cümle beyninde münâvebeten taksîm ile hiç ferde lüzûmundan ziyâde hatab ahz ettirilmemesi emrine mezîd-i ihtimâm ve dikkat ve her kim lüzûmundan ziyâde ahz eder ve vâkıf olup haber vermez ve hammâmcılardan ve sefâin rüesâsından tahsîs kasdeder ve cem‘iyetbaşı olarak Bâb-ı Âlî’ye tazallüm-i hâl eder ve nisvân ve sıbyân hammâmlarına kalîl hatab verir ve iktizâ eden masârifini kendilerden mâ‘adâya tarh ve taksîm eder ise tahkīk ile beher hâl icrâ-yı tedîblerine müsâra‘at olunacağını iktizâ edenlerin gûş-ı hûşlarına ifâde ve tenbîhe mübâderet ve hilâf-ı emir ve tenbîh harekete ictisâr edenlerin icrâ-yı tedîbleri için isim ve şöhretleriyle huzûrumuza i‘lâma müsâra‘at eyleyesiz deyü buyruldu. Fî 19 min-S sene [1]218