İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 113 Hüküm no: 47 Orijinal metin no: [16b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Odun sıkıntısının giderilmesi için büyük cins gemiler inşa etmeleri istenen şahıslara, gemileri bir an önce yapmaları hususunda tembihte bulunulması Sefîne inşâsı için fermân-ı âlî. İstanbul Kādısı Fazîletlü Efendi ( ) ve Yeniçeri Ağası ( ) ve Gümrük Emîni Ağa Âsitâne-i sa‘âdetde hatabın nedreti, hatab nakledegelen çenber ve çekeleve sefînelerinin kılletinden iktizâ etmekden nâşî bundan akdem Âsitâne’de ve sevâhil-i Bahr-i Siyah’da o makūle sefâin inşâsına muktedir olanlar defter olunup yaptırmaları tenbîh ve fîmâ-ba‘d işbu yapılacak sefâin hakkında [17a] angarya mu‘âmelesi olunmamak üzere nizâma rabt olunmuş iken içlerinden fakat birkaçı inşâ edip mâ‘adâsı müsâmaha ettikleri tahkīk olunup husûs-ı merkūm ibâdullâha râci‘ masâlihden olmak hasebiyle hatab muzâyakası def‘i için beher hâl kifâyet mikdârı çenber ve çekeleve bulunmakdan lâ-büd olarak mukaddem verilen karâr üzere defter olunanların cümlesi sefâin-i mezbûreyi yaptırmak ve mümâna‘at eder ise tedîb olunmak iktizâ eylediği zâhir olmağla imdi tarafınızdan adam ta‘yîniyle gönderilen defterde mezkûr kesânı celb ve keyfiyeti iktizâ edenlere tefhîm ve te’kîd ile ber-mûceb-i defter sefâin-i mezbûrenin inşâsına me’mûr olanların bilâ-noksan bir ân akdem inşâ ve ikmâl eylemeleri esbâbının istihsâline dikkat ve yine muhâlefet eder olur ise li-ecli’t-tedîb derhâl Bâb-ı Âlî’ye inhâ ve iş‘âra müsâra‘at eyleyesiz deyü buyruldu. Fî 27 Ra sene [1]218