İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 114 Hüküm no: 48 Orijinal metin no: [17a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’daki bütün mahalle, sokak, çarşı ve pazarlardaki ev ve dükkânların önlerinin, sahipleri tarafından daima süpürtülüp temiz tutulması Esvâk ve pazar süpürmesi için fermân. Bâ-sahh-ı âlî. İstanbul Kādısı Fazîletlü Efendi Der-aliyye’de esvâk ve pazarda mülevvesâtın terâkümü cemî‘ zamanda ve husûsan eyyâm-ı hârrede mûris-i ta‘affünât olarak ibâdullâha bâ‘is-i mazarrât olduğundan gayri geşt ü güzâr edenlerin elbisesini telvîs edip ma‘a-hâzâ her hâlde tahâret ve nezâfet muktezâ-yı şi‘âr idiği bedîhî bir hâlet olmakdan nâşî çarşı ve pazarın tathîri bâbında çend-rûz mukaddem ve bu def‘a izzetlü Yeniçeri Ağası’na hitâben beyâz üzerine evâmir-i aliyye ısdâr olunup ancak mahallât esvâkının dahi tathîr olunması ehemm ü elzem olmağla imdi Âsitâne-i sa‘âdetde vâki‘ kâffe-i mahallâtda mevcûd ve esvâk ve pazarda kâin büyût ve dekâkîn ashâbı kendi hâne ve dükkânları pîşgâhlarını dâimâ süpürtüp envâ‘-ı mülevvesât ve lâşeden kemâliyle pâk ve tathîr eylemelerini imâmlar ve esnâf kethudâları ma‘rifetleriyle cümleye tenbîh ve te’kîd ve ba‘d-ezîn her kimin hâne ve dükkânı önünde mülevvesât ve lâşe bulunursa ol hâne ve dükkân sahiblerinden kat‘an suâl olunmayıp mahallesi imâmı ve esnâfı kethudâsı derhâl tedîb olunacağını gûş-ı hûşlarına ifâde ve ilkā ile ona göre ihtimâm eylemelerini tenbîhe mübâderet ve siz dahi ale’d-devam esvâk ve pazarın temiz ve tâhir bulunmasına dikkat eyleyesiz deyü buyruldu. Fî 19 R sene [1]218