İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 121 Hüküm no: 53 Orijinal metin no: [19a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sadece büyük cins gemi inşa ettirilmesi hakkındaki emir gereğince, şu anda inşa tamamlanmakta olan küçük cins gemilerin bitirilmesine izin verildiği, ancak bunun inşasına başlananları kapsamadığı Sefîne fermânı. Akzâ kuzâtü’l-Müslimîn, evlâ vülâti’l-muvahhidîn, ma‘denü’l-fazli ve’l-yakīn, râfi‘u a‘lâmi’ş-şerî‘ati ve’d-dîn, vârisü ulûmü’l-enbiyâi ve’l-mürselîn, el-muhtassu bi-mezîd-i inâyeti’l-Meliki’l-mu‘în Mevlânâ İstanbul Kādısı Mevlânâ ( ) -zîdet fezâilühû- ve iftihârü’l-emâcid ve’l-ekârim, câmi‘ü’l-mahâmid ve’l-mekârim, el-muhtassu bi-mezîd-i inâyeti’l-Meliki’d-dâim Dergâh-ı mu‘allâm kapıcıbaşılarından İstanbul Gümrüğü Emîni Hasan -dâme mecduhû- tevkī‘-i refî‘-i hümâyûn vâsıl olucak ma‘lûm ola ki Bahr-i Siyah’a âmed-şüd eden tüccâr tâifesi mukaddemâ inşâ ettirdikleri kalyon kıçlı ve üç direkli ve şehtiye ve pergande ve çekeleve ve çenber ta‘bîr olunur sefînelerin bir müddetden beri inşâsını terk edip yerlerine çektirme ve beş çifte ta‘bîr olunur sagīr sefîneler inşâ ettirilerek kebîr sefînelere kıllet târî olduğundan bir mahalle mühimmât irsâli ve Dersa‘âdet’ime zahîre ve hatab celbi usret kesb etmiş olduğuna binâen sefâin inşâsı husûsu bir taht-ı râbıtaya idhâl olunmasına irâde-i aliyyem ta‘alluk edip hâlâ rûy-ı deryâda mevcûd olan çektirme ve beş çifte<>lere ta‘arruz olunmayarak fîmâ-ba‘d Bahr-i Siyah’ın Anadolu ve Rumeli sevâhilinde Mihaliç ve Bandırma ve Körfez ve İznikmid ve Hereke ve Konca ve Tavşancı ve sâir sefâin inşâ olunan mahallerde çektirme ve beş çifte inşâ olunmayıp kadîmi üzere sâlifü’l-beyân sefîne inşâ olunmak ve sivri kıçlı sefîneler dahi inşâ olunmayıp onların yerine çekeleve yaptırılmak ve bundan böyle memnû‘ olan çektirme ve beş çifte inşâsına bir tarafda mübâşeret olunur ise vakt be-vakt Tersâne-i âmiremden mübâşirler irsâliyle tecessüs olunup nâ-tamam ise şîkest ettirilip [19b] eğer tekmîl olunmuş ise cânib-i mîrîden zabtolunmak ve bundan böyle bir mahâlde çektirme ve beş çifte inşâsına mübâşeret olunur ise memnû‘ olan çektirme ve beş çifte inşâsını men‘ ve Der-aliyye’me ihbâr etmedikleri için hükkâm ve zâbitân dahi tedîb olunmak üzere bundan akdem nizâma rabt ve tevsîk olunduğunu hâvî havâlî-i merkūmede vâki‘ vülât ve hükkâm ve sâir zâbitân ve Boğdan Voyvodası’na hitâben başka başka evâmir-i şerîfem ısdâr olunduğu beyânıyla mevâdd-ı merkūmeyi Der-aliyye’mde mevcûd ashâb-ı sefâin rüesâsına i‘lân ve işâ‘at eylemeniz bâbında siz ki Mevlânâ ve Kapıcıbaşı-i mûmâ-ileyhimâsız, size hitâben emr-i şerîfim şeref-rîz-i sudûrundan sonra ba‘zı rüesâ-yı sefâin sevâhil-i Rumeli’de ve Kalas İskelesi’nde beş çifte ve çektirme inşâsına mübâşeret ve hitâmı kuvvet-i karîbeye gelip küllî masârifleri olup alâ-hâlihî terk olunduğu sûretde mutazarrır olacaklarından bahisle fîmâ-ba‘d beş çifte ve çektirme inşâsına mübâşeret olunmayarak fakat hitâmı karîb olan çektirme ve beş çiftelerin karîbü’l-ahd[d]e tekmîl ve deryâya tenzîl olunmasına ruhsat verilmesini istid‘â ve istirhâm eylediklerine binâen o makūle nizâm-ı mezkûrdan mukaddem inşâsına mübâşeret olunmuş ve tenzîli kuvvet-i karîbeye gelmiş çektirme ve beş çiftelerin güverte tahtaları ve derûn ve bîrûn tahtaları tahtalanmış olanların on güne dek tekmîl olup deryâya ilkā olunmasına ruhsatı muhtevî havâlî-i merkūmede vâki‘ vülât ve hükkâm ve sâir zâbitân-ı mûmâ-ileyhim ve Boğdan Voyvodası’na hitâben eğerçi evâmir-i şerîfem şeref-efzâ-yı sudûr olup derdest-i inşâ olan beş çifte ve çektirmelerin şimdiye kadar tekmîl-i inşâ olunmuş olduğu bedîhî ve nümûdâr olup ve bundan sonra ber-vech-i muharrer ruhsatı hâvî muahharan sâdır olan evâmir-i şerîfemi ser-rişte ittihâzile bundan sonra memnû‘âtdan olan mârrü’z-zikr beş çifte ve çektirme ve sivri kıçlı sefîne inşâsına bir vechile rızâ-yı aliyyem olmamağla fîmâ-ba‘d havâlî-i merkūmede o makūle beş çifte ve çektirme ve sivri kıçlı sefâin inşâ<> olunmamak ve hilâf-ı fermân-ı âlî-şân inşâ olunmakda olanları var ise derhâl fesh birle men‘-i küllî ile men‘ ve mukaddemâ nizâmı hâvî sudûr eden <> emr-i şerîfimin infâz ve icrâsına ale’d-devam mezîd i‘tinâ ve dikkat ve hilâf-ı fermân ve mugāyir-i tenbîhât vaz‘ı tecvîzden gāyetü’l-gāye tehâşî ve mücânebet olunmak bâbında bu def‘a dahi mûmâ-ileyhime hitâben başka başka evâmir-i şerîfem ısdâr ve tisyârıyla tenbîh ve te’kîd olunmuş olmakdan nâşî mevâdd-ı mezkûreyi Der-aliyye’mde mevcûd olan ashâb-ı sefâin rüesâsına gereği gibi i‘lân ve işâ‘at eylemeniz fermânım olunmağın te’kîden ve ihtimâmen işbu emr-i şerîfim ısdâr olunmuşdur. İmdi fîmâ-ba‘d havâlî-i merkūmede mârrü’z-zikr beş çifte ve çektirme ve sivri kıçlı sefâin inşâsına bir vechile rızâ-yı aliyyem olmamağla hilâf-ı fermân inşâ olunmakda olanları var ise derhâl fesh birle men‘-i küllî ile men‘ olunacağı husûsunu Dersa‘âdet’imde mevcûd olan ashâb-ı sefâin rüesâsına etrâfıyla i‘lân ve işâ‘at birle nizâm-ı mezkûrun ale’d-devam îfâ ve icrâsına mezîd i‘tinâ ve nezâret eylemeniz matlûb-ı kat‘î-i Pâdişâhânem olduğu siz ki Mevlânâ ve Kapıcıbaşı-i mûmâ-ileyhimâsız, ma‘lûmunuz oldukda ber-vech-i meşrûh amel ve harekete ve infâz-i emr u irâde-i Pâdişâhâneme bi’l-ittihâd mezîd i‘tinâ ve dikkat olunmak ve hilâf-ı emr [u] fermân ve münâfî-i tenbîhât vaz‘ ve hâlât tecvîz olunmamak bâbında fermân-ı âlî-şânım sâdır olmuşdur. Buyurdum ki: Hükm-i şerîfim vusûl buldukda bu bâbda vech-i meşrûh üzere şeref-yâfte-i sudûr olan fermân-ı vâcibü’l-ittibâ‘ ve lâzımü’l-imtisâlimin mazmûnuyla amel ve hareket ve hilâfından tevakkī ve mübâ‘adet eyleyesiz. Şöyle bilesiz alâmet-i şerîfe i‘timâd kılasız. Fî 29 min-C sene [1]218 Mahrûse-i Kostantıniyye