İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 123 Hüküm no: 54 Orijinal metin no: [20a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İleride et sıkıntısı çekilmemesi için lüzumsuz kesim yapılmaması ve kuyruk yağı satışında nizama uyulması hususunda kasap esnafına tembihte bulunulması Kasab esnâfına dâir fermân. Bâ-sahh-ı âlî. Fazîletlü İstanbul Kādısı Efendi Kasab tâifesinin öteden beri habâset ve mel‘aneti ma‘lûm olan hâlâtdan olup Dârü’s-saltanati’s-seniyye sekenesinin tevsî‘-i akvât-ı lâzımesi için küllî ikdâm ve ihtimâm ile mesâfe-i karîbe ve ba‘îdeden ağnam celbine cehd olunarak ve bi-hamdihî te‘âlâ bu esnâda tevârüd etmekde olan ağnam-ı kesîrenin bi-mennihî te‘âlâ eyyâm-ı mübâreke ve hengâm-ı şitâda zarûret çekmeyecek vechile lüzûmu derece sarfıyla telefden vikāyesine dikkat lâzımeden iken tâife-i merkūme kıllet-i ağnam evânında tutturabildikleri bahâ ile lahm satmak mel‘a[ne]tine alışmış olduklarından yine fesâdlarına revâc vermek için eyyâm-ı mübâreke ve mevsim-i şitâda kıllet-i ağnamı mûcib olmak için yevmiye mertebe-i ma‘lûme-i muktezıyesinden ziyâde ağnam zebh ve itlâf etmekde oldukları ve kefere ve sâire lüzûmundan ziyâde lühûm verdikleri ve ziyâde zebhi takrîbiyle ekser dükkânlarında dört beş günlük lahm kalıp ta‘affün ederek bâ‘is-i ızâ‘at olmakda idiği tahkīk olmakdan nâşî bu husûsun bir râbıta-i kaviyyesine bakılıp ağnamın telefden vikāyeti ve mütenebbih ve memnû‘ olmayanların eşedd-i cezâ ile tedîbi ve bundan mâ‘adâ kuyruklar kasab dükkânlarına getirilmeyip mahâllinde kırkar paraya füruht olunagelmekle bunun dahi men‘iyle nizâmının icrâsı matlûb-ı kat‘î olmağla imdi Kasabbaşı Ağa ve kasablar kethudâsı ve sâir iktizâ eden ustaları huzûrunuza celb ve keyfiyeti tefhîm ile ba‘d-ezîn kasablar beher yevm ibâdullâha lüzûmundan ziyâde ağnam zebh etmeyip herkese kifâyetinden ziyâde vermeyerek ağnam-ı mütevârideyi telefden gereği gibi mücânebet etmek ve kavurmalık için bir re’s koyun füruht etmemek ve kuyruklar dahi vech-i meşrûh üzere alınıp satılmayarak nizâmı icrâ olunmak husûsunu gûş-ı hûşlarına tamamca ilkā birle ma‘âza’llâhi te‘âlâ bundan sonra eyyâm-ı mübâreke ve mevsim-i şitâda ibâdullâhın ağnamdan zarûreti lâzım gelir ise kasabların esnâ-i kılletde istedikleri gibi satmak için itlâfları sebeb olmuş olacağına mebnî evvelen kasablar kethudâsı ve sâniyen ustalardan lâzım gelenlere tertîb-i cezâ ile mu‘âmele olunacağını <> bildirip ona göre hareketlerini ber-vech-i ekîd tenbîhe mübâderet ve siz dahi ale’d-devam nezâret birle bu bâbda hâtır ve gönüle ve [bir] ferdi himâyete bakmayıp vikāye-i ağnam esbâbının istihsâline himmet eyleyesiz deyü buyruldu. Fî 10 C sene [1]218