İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 124 Hüküm no: 55 Orijinal metin no: [20a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kadınların mübârek günlerde Ayasofya ve diğer selatin camilerine gelmeme yasağının, içinde bulunulan üç aylarda da titizlikle uygulanması Yasak fermânı. Bâ-sah. İstanbul Kādısı Fazîletlü Efendi Her bâr, [be]-tahsîs eyyâm-ı mübâreke ve îkād-ı kanâdîl olunacak günlerde cem‘iyetgâh-ı ibâd-ı Müslimîn Ayasofya-i Kebîr ve sâir cevâmi‘-i şerîfe-i selâtîn-i meyâmin-semîrde tâife-i nisvânın ictimâ‘ı envâ‘-ı fuhşiyâtı mûcib olmakdan nâşî öteden beri memnû‘ iken zikrolunan cevâmi‘-i şerîfe hademesinin adem-i takayyüdü ve irâe-i ruhsatları hasebiyle yine eyyâm-ı mübârekede nisâ ol taraflara kasd-ı temâşâ ile vürûd ve tecemmu‘a etmek birle ma‘âbid-i latîfe-i merkūmede iktisâb-ı füyûzât-ı İlâhiye ve isticlâb-ı mağfiret-i Sübhâniye zımnında müctemi‘ olan ricâl, nisânın ıyâdetine def‘ [misillü] hâlâta bâdî oldukları zâhir ü hüveydâ olmağla imdi kadîmî memnû‘ olduğu vechile işbu şuhûr-ı selâse-i gufrân-alâmede dahi sâlifü’l-beyân ma‘âbid-i latîfeye gelmekden nisvânı men‘-i küllî ile men‘ eylemelerini ve takayyüdde müsâmaha ederler ise beher hâl mesûl olacaklarını Ayasofya ve ce[v]âmi‘-i münîfe-i selâtîn-i izâm kayyûmbaşıları ve sâir iktizâ edenlere tenbîh ve tefhîm ve tehdîde mübâderet eyleyesiz deyü buyruldu. Fî 6 B sene [1]218