İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 125 Hüküm no: 56 Orijinal metin no: [20b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’daki yağ tüccarlarının, Bursa’daki Evkaf-ı hümayun Mumhanesi’ne yapılan don yağı tahsisatının karşılanabilmesi için İstanbul’a daha fazla don yağı getireceklerine dair taahhütte bulundukları Bursa’da kâin Mumhâne-i cedîde beher sene 70 yedek don yağı ta‘yîn fermânıdır. İlmühaber Kāimesi Cenâb-ı hazret-i şehriyârî Evkāf-ı şerîfleri müsakkafâtından mahrûse-i Bursa’da binâ ve inşâ olunan Mumhâne’nin binâ ve inşâsı, mahrûse-i mezbûre belde-i azîm ve ahâlî ve sekenesi vefret ü kesret üzere olduklarına binâen dûçâr oldukları şem‘-i revgan muzâyakasından vâreste ve vikāye irâde-i hayriyesine mebnî olup ancak mahrûse-i mezbûre ve etrâf u enhâsında don yağının tedârükü adîmü’l-imkân ve Vakf-ı hümâyûn mülhakātından olan Mumhâne-i mezkûrede i‘mâl olunacak şem‘-i revgan için lüzûmu mertebe don yağının Tuna sevâhilinden vürûd eden don yağından i‘tâsıyla Vakf-ı şerîf Mumhânesi’nin i‘mâl ve i‘mârına ve mahrûse-i mezbûrede sâkin ibâdullâhın şem‘-i revgan husûsunda def‘-i muzâyaka ile isticlâb-ı da‘avât-ı hayriyelerine i‘tinâ ve dikkat umûr-ı vâcibeden olmağla ber-vech-i muharrer Tuna sevâhilinden Âsitâne-i sa‘âdete vürûd edip tevzî‘ ve taksîm olunan don yağından mahrûse-i mezbûre Mumhânesi’ne beher sene yetmiş yedek don yağı ta‘yîn ve tahsîs kılınıp ve irsâline me’mûr ma‘rifetiyle irsâl ve tesyîr olunup âhardan vechen mine’l-vücûh mümâna‘at ve imrârına muhâlefet olunmamak için Başmuhâsebe’ye kayd ve İstanbul Kādısı Efendi hazretleri ve Gümrük Emîni Ağa’ya hitâben bir kıt‘a emr-i âlî ve Vakf-ı hümâyûn tarafına ve Kapan defterlerine ilmühaberleri i‘tâsını hâlâ Vâlide Sultân-ı aliyyetü’ş-şân hazretlerinin kethudâları sa‘âdetlü, atûfetlü Yusuf Ağa hazretleri bâ-takrîr inhâ etmeleriyle iktizâsı fazîletlü İstanbul Kādısı Efendi hazretlerine havâle olundukda; İstanbul’da Bal Kapanı ve Galata Yağ Kapanı nâzırları ve tüccârı meclis-i şer‘a ihzâr olunup Vakf-ı hümâyûn-ı meberret-makrûn müsakkafâtından olup mahrûse-i Bursa’da vâki‘ def‘-i muzâyaka-i ibâdullâh için binâ ve inşâ olunan Şem‘hâne’de i‘mâl olunmak üzere Tuna ve sevâhilinden Âsitâne-i aliyye tertîbinden fazla, kâfî ve vâfî Âsitâne-i sa‘âdete revgan-ı don celb eylemelerini tenbîh ve ta‘ahhüd ettirdiğini mübeyyin hâlâ İstanbul Kādısı fazîletlü Süleyman Efendi hazretleri memhûr[en] i‘lâm etmeleriyle i‘lâmı mûcebince Başmuhâsebe’ye kayd ile emri ve ilmühaberi i‘tâ olunmak bâbında fermân-ı âlî sâdır olmağın mûcebince İstanbul Kādısı’na ve Gümrük Emîni Ağa’ya hitâben emr-i âlî ve Vakf-ı hümâyûn tarafına ilmühaberi verilmekle kapan defterlerine dahi işbu ilmühaber kāimesi verildi. Fî 13 S [Safer] sene [1]217