İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 128 Hüküm no: 59 Orijinal metin no: [21b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hazine akçesi veya marbaş adıyla piyasada dolaşmakta olan düşük ayarlı, hileli beyaz akçenin kullanımının yasaklandığı Kefere sikkesiyle marbaş ta‘bîr olunan akçe yasağı. Bâ sah. Fazîletlü İstanbul Kādısı Efendi Bir müddetden beri düvel sikkesiyle meskûk ve veznen birer dirhem mikdârı olarak mesbûk olup hazîne akçesi ve marbaş nâmıyla ihtirâ‘ olunan bir nevi‘ beyâz akçe bu esnâda memâlik-i mahrûse ve Âsitâne-i sa‘âdetde mütekessir olup ancak yirmi beş ayârında olmak takrîbiyle derûnunda olan sîm-i hâlisa nazaran kıymeti katı dûn iken beher adedi altışar ve yedişer paraya mütedâvil olmakda ve nakd-i mezkûr bu derecede kem-ayâr olduğuna mebnî dirhem ve nakd ıtlâkından dûr ve bayağı kalb ve mağşûş olup ve dâd ü sited meşrû‘ olmayacak mertebede redî olmak mülâbesesiyle memâlik-i İslâmiyede revâcı bir vechile câiz olmadığından gayri tağrîr ve gabni îcâb ederek ibâdullâhı ızrâr ve mu‘âmelât-ı nâsı ifsâd ile sekene-i bilâd-ı İslâmiyeye îsâl-i hasâr etmekde iken tüccâr ve âhâd-i nâs nakd-i mezkûrun künh ü hakīkatini derk etmeyerek ahz ü [i]‘tâsına mükib olduklarından refte refte revâcı ziyâdeye mütesâ‘id olmak melhûz olmakdan nâşî nakd-i mağşûş-i mezkûr bilâd-ı İslâmiyeden hiçbir mahâlde râyic olmamak üzere külliyen men‘ ile mazâr ve mahâzîr-i mezkûreden ibâdullâhın vikāyesi lâzımeden olmağla imdi fîmâ-ba‘d Der-aliyye’de hiçbir vechile alınıp verilmemesi husûsunu bi’l-cümle esnâf kethudâlarına ve sâir iktizâ edenlere gereği gibi tenbîh ve te’kîde müsâra‘at ve hilâf-ı emir ve tenbîh harekete ictisâr eder olur ise tedîb olunacaklarını ifâde ve tenbîhe mübâderet eyleyesiz deyü buyruldu. Fî 10 Ra sene [1]218