İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 131 Hüküm no: 61 Orijinal metin no: [22a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mihaliç Voyvodası Süleyman’ın İstanbul’dan satın aldırdığı kölenin Mihaliç’e nakline izin verildiği Bir nefer gulâmın Anadolu cânibine izin fermânı. Akzâ kuzâtü’l-Müslimîn, evlâ vülâti’l-muvahhidîn, ma‘denü’l-fazli ve’l-yakīn, râfi‘u a‘lâmi’ş-şerî‘ati ve’d-dîn, vârisü ulûmü’l-enbiyâi ve’l-mürselîn, el-muhtassu bi-mezîd-i inâyeti’l-Meliki’l-mu‘în Mevlânâ İstanbul Kādısı -zîdet fezâilühû- ve iftihârü’l-emâcid ve’l-ekârim, câmi‘ü’l-mahâmid ve’l-mekârim, el-muhtassu bi-mezîd-i inâyeti’l-Meliki’d-dâim Dergâh-ı mu‘allâm kapıcıbaşılarından İstanbul Gümrüğü Emîni Hasan ve Mihaliç Voyvodası Süleyman -dâme mecdühümâ- ve mefâhirü’l-kuzât ve’l-hükkâm, ma‘âdinü’l-fezâili ve’l-kelâm Âsitâne-i aliyyemden Mihaliç’e varınca yol üzerinde vâki‘ kazâların kuzât ve nüvvâbı -zîde fazluhüm- tevkī‘-i refî‘-i hümâyûn vâsıl olucak ma‘lûm ola ki Memâlik-i mahrûsenin bir tarafı[n]dan iklîm-i Mısır’a kölemen tâifesinden bir neferi imrâr ettirilmemek husûsuna irâde-i kātı‘a-i mülûkânem ta‘alluk edip tüccâr ve sâir kesân yedleriyle veyâhûd elden ele naklolunarak iklîm-i mezkûra hafî ve celî gulâm imrârının men‘ u def‘i husûsu karâr-gîr-i nizâm olup ol bâbda hatt-ı hümâyûn-ı şevket-makrûnum şeref-yâfte-i sudûr olmağla fîmâ-ba‘d tüccâr ve sâirin Mısır tarafına hafî ve celî gulâm imrârına vechen mine’l-vücûh ruhsat ve cevâz gösterilmeyip ale’d-devam kemâl-i taharrî üzere dikkat ve nezâret ve o makūlelerin hufyeten veyâhûd tebdîl-i heyetle imrârına her kim ruhsat eder ise ruhsat verenler ve gerek kölenin ashâbı olan tüccâr ve esircilerin derhâl tedîbât-ı lâyıkaları bilâ-emân icrâ kılınmak ve her bâr tecessüs birle bir takrîb berren ve bahren Mısır’a köle makūlesi gönderilmek murâd ederler ise der-akab ahz ü zabtolunması ve o misillü gulâm hangi zâbit ve gümrükcü ve sâirleri taraflarından haber alıp ahz olunur ise ol gulâm ahz edenlerin olup sahibi olan ahz ve Dersa‘âdet’ime irsâl ve gulâm-ı mezkûr sefînede bulunur ise cânib-i mîrîden zabtolunmak için sefîne ve reisi tevkīf ve keyfiyeti tahrîre müsâra‘at olunması bâbında iki yüz on yedi senesi evâil-i Şevval’inde te’kîdi hâvî İstanbul Gümrüğü Emîni’ne ve memâlik-i mahrûsemde vâki‘ hükkâm ve zâbitâna hitâben evâmir-i şerîfem neşriyle tenbîh ve te’kîd olunmuş idi. Bu def‘a Seyyid Halil nâm kimesnenin Südde-i sa‘âdetime takdîm eylediği bir kıt‘a arzuhâlinde merkūm, Mihaliç Voyvodası mûmâ-ileyh tarafından Der-aliyye’mden bir nefer gulâm mübâya‘a ve tisyâr olunması bâ-tahrîrât iltimâs olunmuş [22b] olduğu beyânıyla bir re’s gulâm-ı mezbûr mübâya‘a ve mûmâ-ileyh tarafına irsâl olunmağla mürûruna izin ve ruhsatı hâvî emr-i şerîfim sudûrunu istid‘â etmekle vech-i meşrûh üzere amel olunmak fermânım olmağın imdi siz ki İstanbul <<Âsitâne>> Kādısı Mevlânâ ve Gümrükcü-i mûmâ-ileyhimâsız, sâire sirâyet etmemek ve bu vesîle ile hafî ve celî cânib-i Mısır’a gulâm imrârına kat‘an cevâz ve ruhsat gösterilmemek şartıyla mârrü’l-beyân bir nefer gulâmın Mihaliç Voyvodası mûmâ-ileyhe irsâline izin ve ruhsat-ı şâhânem erzânî kılındığı ma‘lûmunuz oldukda ber-vech-i muharrer bir neferin mürûruna mümâna‘at ettirmeyesiz ve siz ki esnâ-yı râhda vâki‘ kuzât ve nüvvâb-ı mûmâ-ileyhimsiz, mârrü’l-beyân bir nefer gulâmın mürûruna mümâna‘at olunmayıp ve lâkin bu vesîle ile hilâf-ı fermân ve mugāyir-i nizâm hafî ve celî cânib-i mezkûra gulâm imrârına irâet-i ruhsatdan mücânebet eyleyesiz ve sen ki Mihaliç Voyvodası mûmâ-ileyhsin, gulâm-ı mezkûr tarafına vürûdunda işbu emr-i şerîfimi battalda hıfz için vusûlünü mübeyyin tahrîrâtınla ma‘an Der-aliyye’me irsâle mübâderet eylemen bâbında fermân-ı âlî-şânım sâdır olmuşdur. Buyurdum ki: Hükm-i şerîfimle vusûl buldukda bu bâbda vech-i meşrûh üzere şeref-yâfte-i sudûr olan fermân-ı vâcibü’l-ittibâ‘ ve lâzımü’l-imtisâlimin mazmûn-ı münîf-i itâ‘at-makrûnuyla amel ve hareket ve hilâfından be-gāyet tehâşî ve mücânebet eyleyesiz. Şöyle bilesiz alâmet-i şerîfeme i‘timâd kılasız. Tahrîren fi’l-evâhiri şehri Zilka‘de sene [1]218 Be-makām-ı Kostantıniyye-i mahrûse