İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 135 Hüküm no: 66 Orijinal metin no: [23b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Frenklerin İstanbul ve havalisinde basma hatlı Kur’ân-ı Kerim, fıkıh kitabı vb. dini evrak satmalarının yasaklandığı İstanbul Kādısı İzzetlü, Fazîletlü Efendi Hazretleri Ba‘zı tâife-i Efrenc basma hat ile Mushaf-ı şerîf ve kütüb-i fıkhiye ve âyât-ı kerîme ve âsâr-ı şerîfe evrâkı gezdirip Âsitâne ve havâlîsinde bey‘ ü i‘tâ edip musâdif olanlar dahi almakda olduğundan bu vechile te‘âtîsi tâife-i merkūmenin peyder pey getirmesini müstelzim ve bu misillü kütüb ve âsâr-ı münîfenin eyâdî-i Efrencde bey‘ u şirâsı mücâz olmadığından men‘i şer‘an lâzım ve mühim olmağla imdi fîmâ-ba‘d Efrencden basma hat ile Mushaf-ı şerîf ve kütüb ve evrâkın hiçbirini sahhâf ve mücellid esnâfından ve Bedesten ahâlîsi ve çarşılı ve sâirden bir kimesne ahz ü i‘tâ etmemek üzere külliyen men‘ ve memnû‘ olmayanlar derhâl tedîb olunacağını tefhîm ve işâ‘at ve işbu fermân-ı âlî ilmühaberlerini Galata ve Hâslar ve Üsküdar kādıları fazîletlü efendiler taraflarına dahi irsâle mübâderet ile umûr-ı dîniyeden olan işbu emr-i ehemme ale’d-devam nezâret ve mütenebbih olmayanları irsâle himmet eyleyeler deyü buyruldu. Fî-selhi S sene [1]219