İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 138 Hüküm no: 68 Orijinal metin no: [24b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarraf Angili Çalık ve ortaklarının borçlarının, tek seferde ödeyemeyecekleri hukuken sabit olur ise taksitlendirilmesi Medyûn fermânıdır. A‘lemü’l-ulemâi’l-mütebahhirîn, efdalü’l-fudalâi’l-müteverri‘în, yenbû‘u’l-fazli ve’l-yakīn, keşşâfü’l-müşkilâti’d-dîniye, hallâlü’l-mu‘dılâti’l-yakīniye, miftâhu künûzi’l-hakāyık, mısbâhu rumûzi’d-dakāyık, el-mahfûfu bi-sunûf-i avâtıfı’l-Meliki’l-a‘lâ Anadolu Kādıaskerliği pâyesiyle bi’l-fi‘il İstanbul Kādısı Mevlânâ Mîr Mehmed Emin -edâmallâhü te‘âlâ fezâilehû- tevkī‘-i refî‘-i hümâyûn vâsıl olucak ma‘lûm ola ki Sarrâf tâifesinden Angeli Çalık ve şerîkleri Mike ve Paraşkeva ve Nikola nâm zimmîlerin Südde-i sa‘âdetime takdîm eyledikleri arzuhâllerinde bunların Âsitâne-i aliyyem sekenesinden ma‘lûmü’l-ism bâzergânlara bâ-tahvîlât altı yüz elli kîse akçe mikdârı deynleri olup ancak def‘aten edâya iktidârları olmadığı ve dâyinleri mezbûrlar dahi alacaklarını def‘aten mutâlebe ve cebir ve tazyîkdan hâlî olmadıkları beyânıyla meblağ-ı mezbûrun beş seneye dek mukāssatan edâ ettirilmek bâbında emr-i şerîfim sudûrunu istid‘â etmeleriyle dâyinlerine olan deynlerinin beş seneye dek mukāssatan edâ ettirilmek ve def‘aten talebi ve ahz ü habs teklîfiyle te‘addî ettirilmemek fermânım olmağın imdi sen ki mevlânâ-yı müşârün-ileyhsin, ber-vech-i meşrûh mersûmların dâyinlerine olan deynlerini def‘aten edâya adem-i kudretleri inde’ş-şer‘ mütehakkık olduğu hâlde beş seneye dek mukāssatan edâ ettirilmek ve def‘aten talebi ve ahz ü habs teklîfiyle te‘addî ve bunlar dahi taksîtleri hulûlünde ashâb-ı düyûna cebir ve ezâ etmemeleri emrine ihtimâm ve dikkat olunmak bâbında fermân-ı âlî-şânım sâdır olmuşdur. Buyurdum ki: Hükm-i şerîfimle vusûl buldukda bu bâbda vech-i meşrûh üzere şeref-yâfte-i sudûr olan işbu fermân-ı celîlü’l-kadrimin mazmûn-ı itâ‘at-makrûnuyla amel ve hareket ve hilâfından hazer ve mücânebet eyleyesin. Şöyle bilesin alâmet-i şerîfeme i‘timâd kılasın. Tahrîren fi’l-evâhiri şehri Rebî‘i’l-ûlâ sene tis‘a-aşer ve mieteyn ve elf. Kostantıniyyeti’l-mahrûse