İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 152 Hüküm no: 75 Orijinal metin no: [29a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eyüp’te arpacı dükkânı bulunmadığından, Eyüp bakkallarına sadece ahali ve yolculara satmaları kaydıyla Kapan’dan arpa verilmesine müsaade edildiği Eyüp’de bakkāl şa‘îr füruhtuna izin fermânı. A‘lemü’l-ulemâi’l-mütebahhirîn, efdalü’l-fudalâi’l-müteverri‘în, yenbû‘u’l-fazli ve’l-yakīn, keşşâfü’l-müşkilâti’d-dîniye, hallâlü’l-mu‘dılâti’l-yakīniye, miftâhu künûzi’l-hakāyık, mısbâhu rumûzi’d-dakāyık, el-mahfûfu bi-sunûf-i avâtıfı’l-Meliki’l-a‘lâ Anadolu Kādıaskerliği pâyesiyle bi’l-fi‘il İstanbul Kādısı olan Mevlânâ Mîr Mehmed Emin -edâmallâhü te‘âlâ fezâilehû- tevkī‘-i refî‘-i hümâyûn vâsıl olucak ma‘lûm ola ki Bakkāl Rizo nâm zimmînin Südde-i sa‘âdetime takdîm eylediği arzuhâlinde medîne-i Ebî Eyüb-i Ensârî -radıye anhü Rabbühü’l-Bârî-de vâki‘ Burnaz Dükkânı demekle ma‘rûf bir bâb dükkânda bakkāl olup ez-kadîm dükkânında şa‘îr füruht olunagelmiş iken bu eyyâmda Kapan tarafından mümâna‘at olunmağla mağdûriyetini beyân birle ol bâbda istid‘â-yı inâyet eylediğine binâen husûs-ı mezbûr sen ki mevlânâ-yı müşârün-ileyhsin, sana lede’l-havâle Kapan me’mûrlarından istifsâr olundukda medîne-i merkūmede vâki‘ bakkāl esnâfı ez-kadîm şa‘îr füruht eder olmalarıyla mikdâr-ı kifâye Kapan’dan şa‘îr verilegelip fakat bu esnâda şa‘îrin kılletinden nâşî mikdâr-ı kifâye şa‘îr verilemediğini beyân etmeleriyle fi’l-hakīka medîne-i merkūmede mahsûs şa‘îrin dükkânı olmayıp gerek ahâlî ve gerek ebnâ-i sebîl iktizâ eden şa‘îri bakkāllardan iştirâ eylemeleri mu‘tâd-ı kadîm olmağla fîmâ-ba‘d medîne-i merkūme bakkāllarına taşralara bey‘ olunmayıp ancak ahâlî ve ebnâ-i sebîle kifâyet edecek mikdârı Kapan’dan şa‘îr verilmek için izin ve ruhsatı hâvî emr-i şerîfim sudûrunu i‘lâm etmenle i‘lâmın mûcebince tanzîm olunmak fermânım olmağın [29b] imdi ber-vech-i muharrer i‘lâmın mûcebince fîmâ-ba‘d medîne-i merkūme bakkālları taşralara bey‘ etmeyip ancak ahâlî ve ebnâ-i sebîle kifâyet edecek mikdârı Kapan’dan şa‘îr verilmek üzere izin ve ruhsat verildiği ma‘lûmun oldukda ber-vech-i meşrûh amel ve hareket olunmak <> bâbında fermân-ı âlî-şânım sâdır olmuşdur. Buyurdum ki: Hükm-i şerîfimle vusûl buldukda bu bâbda vech-i meşrûh üzere <> şeref-yâfte-i sudûr olan fermân-ı vâcibü’l-ittibâ‘ ve lâzımü’l-imtisâlimin mazmûn-ı itâ‘at-makrûnuyla amel ve hareket ve hilâfından hazer ve mücânebet eyleyesin. Şöyle bilesin alâmet-i şerîfe i‘timâd kılasın. Tahrîren fi’l-evâili Recebi’l-ferd sene [1]219 Be-makām-ı Kostantıniyyeti’l-mahrûse