İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 157 Hüküm no: 79 Orijinal metin no: [30b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mısır’dan İstanbul’a erzak getiren gemi sahiplerinin kefillerinin, getirilen yüklerin teslim edildiği belgelenmedikçe kefaletten kurtulamayacakları Erzâk-ı Mısriyyenin Âsitâne-i sa‘âdete vürûduna nizâmın ilmühaberidir. Bâ-sahh-ı âlî. Ber-vech-i muharrer Dîvân-ı Hümâyûn tarafından emr-i şerîf tahrîr olunup İstanbul Kādısı Efendi tarafına ilmühaberi verilmekle İstanbul Gümrüğü Emîni Ağa tarafına dahi ilmühaber olunmak üzere aynıyla işbu sûret verildi. İskenderiye Nâibi’ne ve İskenderiye Gümrüğü Emîni’ne ve sâir iş erleri ve vücûh-i belde -zîde kadrühum-e Bundan mukaddem Âsitâne-i devlet-âşiyânem için pirinç ve sâir erzâk-ı Mısriyye tahmîl olunan sefâinden ba‘zısı İzmir’e gidip ve ba‘zısı esnâ-yı tarîkda hamûlelerini ihrâc ve füruht eyledikleri mesmû‘ olunduğundan ba‘d-ezîn erzâk-ı Mısriyye tahmîl eden sefâin tamam hamûleleriyle doğru Âsitâne-i aliyyeme gelmeğe vesîle olmak için hüccet-i şer‘iye ahz ve kefîle rabt olunması taht-ı râbıtaya idhâl olunup ol bâbda alınan hüccetler takdîm olunmuş olduğu ricâl-i Devlet-i aliyyemden Mısır Defterdârı sâbık iftihâru[‘l-emâcid] Mehmed Salih -dâme mecduhû-nun bundan akdem Dersa‘âdet’ime vürûd olan tahrîrâtında derc ve iş‘âr etmiş olduğuna binâen bundan böyle tevârüd eden sefâin Dergâh-ı mu‘allâm kapıcıbaşılarından hâlâ Emti‘a Gümrüğü Emîni Hasan -dâme mecduhû- ile bi’l-ma‘iyye nezâret olunacağı ve ashâb-ı sefâin hüccetde mezkûr hamûlelerini tamamen Âsitâne-i aliyyeme îsâl ve ihrâc eylediklerini mübeyyin Gümrüğü Emîni buluna[n]lar mühürleriyle memhûr birer kıt‘a vusûl tezkiresi ahz ve İskenderiye’de bu husûsa me’mûr olanlara teslîm eylemedikçe kefîlleri kefâletden ihrâc olunmamak üzere işbu nizâm-ı müstahsenenin mütemmimi olduğunu Anadolu Kādıaskerliği pâyesiyle bi’l-fi‘il İstanbul Kādısı olan Mîr Mehmed Emin -edâmallâhü te‘âlâ fezâilehû- i‘lâm etmekle fîmâ-ba‘d tahrîr olunacak hüccetlerde ber-vech-i muharrer vusûl tezkiresi ahzı ve kefîlleri vâsıtasıyla İskenderiye’de [31a] bu husûsa me’mûr olanlara teslîm ile kefîlleri kaydı kefâletden halâs olunmaları sûretine dahi râbıta verilip itmâm-ı nizâmına ve ol vechile peyder pey Dersa‘âdet’ime erzâk-ı Mısriyyenin sevk ve îsâli emr-i ehemmine i‘tinâ ve dikkat olunmak bâbında Sadrazamım tarafından tasdîr ve tesyîr olunan tahrîrât Defterdâr-ı mûmâ-ileyhe lede’l-vusûl sen ki Mevlânâ-yı mûmâ-ileyhsin, seni da‘vet ve mazmûn-ı tahrîrâtı tefhîm birle fîmâ-ba‘d tahrîr olunacak hüccetlerde ber-minvâl-i muharrer vusûl tezkiresi ahz ve teslîmi fıkrası dahi derc olunması husûsu[n]u sana tenbîh etmiş olduğu ve ba‘d-ezîn ol vechile ketb ve i‘tâ edeceğin ve bi-hamdihî te‘âlâ bu husûs karîn-i râbıta ve nizâm olup bu esnâda icrâsına dahi ihtimâm olunacağı zâhir olup ancak mürûr-i eyyâm ve [a‘lâm] ile mensî olmayıp ale’d-devam icrâsına dikkat olunmak üzere sûret-i nizâmı Dîvân-ı Hümâyûn’um Kalemi’ne kaydolunup ol bâbda siz ki Mevlânâ ve Gümrük Emîni ve sâir-i mûmâ-ileyhimsiz, size hitâben emr-i şerîfim ısdâr ve İstanbul Kādısı <> mevlânâ-yı müşâr ve İstanbul Gümrüğü Emîni Kapıcıbaşı-i mûmâ-ileyhimâ taraflarına ilmühaberleri i‘tâsı Defterdâr-ı sâbık-ı mûmâ-ileyhin bu def‘a Derbâr-ı şevket-karâr-ı mülûkâneme vârid olunan tahrîrâtında derc ve tastîr olunmuş olmakdan nâşî vech-i meşrûh üzere amel ve hareket olunmak fermânım olmağın tenbîhen ve ifhâmen ve te’kîden ve ihtimâmen mahsûsan işbu emr-i şerîfim ısdâr ve ( ) ile irsâl olunmuşdur. İmdi nizâm-ı mezkûr bi-ibâretihî Dîvân-ı Hümâyûn’um Kalemi’ne kaydolunmağla halefen an-sebak devam ve istikrârına mezîd i‘tinâ ve dikkat olunmak matlûb-ı kat‘î-i Pâdişâhânem olduğu ve zinhâr u zinhâr kusûr ve rehâvet vukū‘una ve mürûr-i eyyâm ile nizâm-ı mezkûra halel tatarrukuna bir vechile rızâ-yı aliyyem olmadığı ve Mevlânâ-yı müşâr ve Gümrükcü-i mûmâ-ileyhimâ taraflarına dahi başka başka ilmühaberleri i‘tâ olunduğu ma‘lûmunuz oldukda ber-vech-i meşrûh amel ve hareket ve nizâm-ı mezkûrun devam ve istikrârına ve tatarruk-ı halelden vikāyesine bi’l-ittifâk i‘tinâ ve nezâret ve hilâf-ı fermân ve münâfî-i nizâm vaz‘ ve hareket vukū‘unu tecvîzden tevakkī ve mücânebet eylemeniz bâbında. Fî-evâsıtı Şa‘bân sene [1]219