İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 160 Hüküm no: 81 Orijinal metin no: [31b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’daki Rumların, borçlarından dolayı hapsedilmeleri gerektiğinde sadece İstanbul ve Galata zindanlarına konulması A‘lemü’l-ulemâi’l-mütebahhirîn, efdalü’l-fudalâi’l-müteverri‘în, yenbû‘u’l-fazli ve’l-yakīn, keşşâfü’l-müşkilâti’d-dîniye, hallâlü’l-mu‘dılâti’l-yakīniye, miftâhu künûzi’l-hakāyık, mısbâhu rumûzi’d-dakāyık, el-mahfûfu bi-sunûf-i avâtıfı’l-Meliki’l-a‘lâ Anadolu Kādıaskerliği pâyesiyle bi’l-fi‘il İstanbul Kādısı olan Mevlânâ Mehmed Emin -edâmallâhü te‘âlâ fezâilehû- ve akzâ kuzâtü’l-Müslimîn, evlâ vülâti’l-muvahhidîn, ma‘denü’l-fazli ve’l-yakīn, râfi‘u a‘lâmi’ş-şerî‘ati ve’d-dîn, vârisü ulûmü’l-enbiyâi ve’l-mürselîn, el-muhtassu bi-mezîd-i inâyeti’l-Meliki’l-mu‘în Mevlânâ Galata Kādısı -zîdet fezâilühû- ve iftihârü’l-ümerâi ve’l-ekâbir, müstecmi‘u cemî‘i’l-ma‘âlî ve’l-mefâhir, el-muhtassu bi-mezîd-i inâyeti’l-Meliki’l-kādir Dergâh-ı mu‘allâm Yeniçerileri Ağası İbrahim Hilmi Ağa -dâme ulüvvuhû- ve iftihârü’l-emâcid ve’l-ekârim, câmi‘ü’l-mahâmid ve’l-mekârim, el-muhtassu bi-mezîd-i inâyeti’l-Meliki’d-dâim Hâssa Bostancıbaşısı Mehmed -dâme mecduhû- tevkī‘-i refî‘-i hümâyûn vâsıl olucak ma‘lûm ola ki İstanbul ve tevâbi‘i Rum Patriği ve Âsitâne’de mukīm cemâ‘at-i metrepolidân Südde-i sa‘âdetime takdîm eyledikleri bir kıt‘a memhûr arzuhâllerin[d]e; re‘âyâ-yı Rum medyûnları i‘lâm-ı şer‘î ile müsbet ve mütehakkık olup edâ-i deyn etmekden imtinâ‘ veyâhûd adem-i kudretleri olanların habs ve tescînleri lâzım geldikde Bâb-ı Âlî’de ve İstanbul ve Galata zindânlarında tevkīf olunageldikleri ve bu vechile mahbesleri müte‘ayyin ve müte‘ârif olup ziyâdesiyle aç ve muhtâc olanların millet tarafından kūt-ı yevmiyelerine bakılıp ba‘zan dahi tesâdduk tarîkıyla te’diye-i deyn ve azâbdan tahlîslerine mübâderet olunur iken bir vakitden beri o misillü medyûnlar müteferrikan mahbeslerde bulunmaları cihetiyle hâl-i ma‘âşlarına bakılamadığından mâ‘adâ dâyinlere dahi min-vechin gadr ve zarar terettüb edegeldiğin inhâ ve fîmâ-ba‘d İstanbul dâhili mütemekkinlerinden olan medyûnlar İstanbul Zindânı’nda ve Galata ve Beyoğlu ve Tophâne ve Kasımpaşa ve Boğaziçi mutavattınlarından olanlar dahi Galata Zindânı’ndan gayri müteferrik mahbeslerde habsetti[ri]lmeyip zindândan hîn-i tahlîslerinde mübâşirlerine îcâb eden rüsûmâtı verilmek bâbında size hitâben emr-i celîlü’l-kadrim sudûrunu istid‘â etmeleriyle siz ki İstanbul Kādısı müşâr ve Galata Kādısı mevlânâ ve Yeniçeri Ağası ve Bostancıbaşı-i mûmâ-ileyhimsiz, vech-i meşrûh üzere o makūle medyûnlar İstanbul ve Galata zindânlarından mâ‘adâ mahbeslerde habsettirilmemek ve hîn-i halâslarında rüsûmâtı mübâşirlerine verilmek ve âhar mahâlde ahz olunurlar ise Bâb-ı Âlî’ye irsâl olunmak fermânım olmağın imdi bâ-i‘lâm-ı şer‘î habs ve tescînleri lâzım gelen re‘âyâ-yı Rum medyûnları minvâl-i muharrer üzere İstanbul ve Galata zindânlarından gayri mahbeslerde habsettirilme[me]lerine ve hîn-i halâslarında rüsûmât-ı muktezıyesi mübâşirlerine verilmek ve mahâll-i uhrâda ahz olunanlardan dahi Bâb-ı Âlî’ye <> irsâl ve tesbîlleri husûsuna ve infâz-i emr-i münîfime ihtimâm ve dikkat ve hilâfı vaz‘ ü hâlet vukū‘una ruhsat ve cevâzdan mübâ‘adet olunmak bâbında fermân-ı âlî-şânım sâdır olmuşdur. Buyurdum ki: Hükm-i şerîfimle [32a] vusûl buldukda bu bâbda vech-i meşrûh üzere şeref-yâfte-i sudûr olan fermân-ı vâcibü’l-ittibâ‘ ve lâzımü’l-imtisâlimin mazmûn-ı itâ‘at-makrûnuyla amel ve hareket ve hilâfından tevakkī ve mücânebet eyleyesiz. Şöyle bilesiz alâmet-i şerîfe i‘timâd kılasız. Tahrîren [fî]-evâili Şevvali’l-mükerrem sene 1219 Kostantıniyyeti’l-mahrûse