İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 161 Hüküm no: 82 Orijinal metin no: [32a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avrupa tüccarlarından Kozma Manoli ve ortağı İstrati’nin, çeşitli kimselere olan borçlarının taksitlendirilmesi Taksît fermânı. A‘lemü’l-ulemâi’l-mütebahhirîn, efdalü’l-fudalâi’l-müteverri‘în, yenbû‘u’l-fazli ve’l-yakīn, keşşâfü’l-müşkilâti’d-dîniye, hallâlü’l-mu‘dılâti’l-yakīniye, miftâhu künûzi’l-hakāyık, mısbâhu rumûzi’d-dakāyık, el-mahfûfu bi-sunûf-i avâtıfı’l-Meliki’l-a‘lâ Anadolu Kādıaskerliği pâyesiyle bi’l-fi‘il İstanbul Kādısı olan Mevlânâ Mehmed Emin -edâmallâhü te‘âlâ fezâilehû- tevkī‘-i refî‘-i hümâyûn vâsıl olucak ma‘lûm ola ki Âsitâne-i aliyyem mütemekkinlerinden Kozma Manoli ve şerîki İstrati nâm zimmîler Südde-i sa‘âdetime arzuhâl edip; bunlar Avrupa’ya dâir ahz ü i‘tâ ile iştigāl üzere iken Efrenc diyârında ba‘zı emvâl ve zimemleri ukde-i te’hîre dûçâr ve ba‘zan dahi zarar ve hasâra giriftâr olup ahz ü i‘tâlarına za‘af tariyân eylediğinden ashâb-ı deynleri def‘aten alacaklarını mutâlebe ve ahz ü habs teklîfiyle ta‘cîz ve te‘addîden hâlî olmadıkları ve deynlerinin te’diyesi matlûbâtlarının ceste ceste tahsîli ile mümkün olacağın bildirip dâyinlerine olan deynleri üç taksîta rabt olunup ve beher taksîtı üç sene mürûrunda edâ eylemek ve taksîtden mukaddem taleb ve rencîde olunmamak bâbında <> emr-i şerîfim sudûrunu istid‘â etmeleriyle vech-i meşrûh üzere üç taksîta rabt ile beher taksîtı üç sene mürûrunda edâ ettirilmek ve def‘aten ve taksîtden mukaddem talebiyle te‘addî ve bu vesîle ile dahi taksît duhûlünde ashâb-ı düyûna cevr u ezâ ettirilmemek fermânım olmağın imdi sen ki Mevlânâ-yı müşârün-ileyhsin, ber-vech-i muharrer mesfûrânın dâyinlerine olan deynlerini üç taksîta rabt ile edâ-i deyn etti[ri]lmek ve dâyinleri taraflarından def‘aten talebiyle tazyîk ü te‘addî ve bu bahâne ile mesfûrlara dahi vakt-i taksîtde dâyinlerine cevr u ezâ ettirilmemek bâbında fermân-ı âlî-şânım sâdır olmuşdur. Buyurdum ki: Hükm-i şerîfimle vusûl buldukda bu bâbda vech-i meşrûh üzere şeref-yâfte-i sudûr olan fermân-ı vâcibü’l-ittibâ‘ ve lâzımü’l-imtisâlimin mazmûn-ı itâ‘at-makrûnuyla amel ve hareket ve hilâfından hazer eyleyesin. Şöyle bilesin alâmet-i şerîfeme i‘timâd kılasın. Tahrîren fi’l-evâili şehri Şevval sene [1]219 Kostantıniyyeti’l-mahrûse