İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 167 Hüküm no: 86 Orijinal metin no: [33b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çeşitli cinsten paraların (Mısır zer-i mahbûbu ve kara kuruş) belirtilen fiyatlardan daha fazlasına alınıp verilmemesi Mısır zer-i mahbûbu (fiyât: 4,5) ve kara guruş (fiyât: 3,5) yasağı. Bâ-sahh-ı âlî. İstanbul Kādısı İzzetlü, Fazîletlü Efendi Hazretleri Ecnâs-ı altın fiyâtına dâir mukaddemce şeref-yâfte-i sudûr olan hatt-ı hümâyûn-ı mehâbet-makrûn derciyle ol bâbda tenbîhât-ı lâzımeyi şâmil cenâb-ı fazîlet-meâblarına ve sâire iktizâ eden fermânlar ısdâr ve tisyâr olunmuş idi. Bu def‘a übbehet-rîz-i sudûr olan diğer hatt-ı şerîf-i şâhânede dahi Mısır zer-i mahbûbu dört buçuk ve kara guruş üç buçuk guruşa râyic olması emir ve tenbîh ve sâlifü’l-beyân ecnâs-i altın ile işbu Mısır altını [34a] ve kara guruş fiyâtının nizâmı müceddeden te’kîd ve fiyât-ı mezkûreden bir akçe ziyâdeye alıp verilmemek üzere men‘ ve tehdîd buyurulmuş olmağla imdi fiyât-ı merkūmeden bir akçe ziyâdeye ahz ü i‘tâsına cesâret eden her kim olur ise olsun mukaddemki fermân-ı âlîde münderic va‘îdâta dûçâr olacağı beyânıyla mârrü’l-beyân Mısır zer-i mahbûbu ve kara guruş fiyât-ı mu‘ayyenesinin dahi tefhîmi zımnında işbu fermân-ı âlî sûretlerinin Bilâ[d]-ı Selâse kādıları fazîletlü efendilere irsâli ve Bedesten ve sâir esnâf kethudâlarına tebyîni ile nizâm-ı mezkûrun ez-ser-i nev te’kîdi esbâbının istihsâline himmet eyleyeler deyü buyruldu. Fî 8 Z sene [1]219