İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 182 Hüküm no: 94 Orijinal metin no: [40a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mısır’dan İstanbul’a mal ve zahire getiren gemilerin bu konudaki nizama uyup uymadıklarının sürekli kontrol edilmesi Mısır tüccârına dâir emr-i âlî. İstanbul Kādısı İzzetlü, Fazîletlü Efendi Hazretleri ve Gümrük Emîni Ağa Fi’l-asl iklîm-i Mısır’dan Dimyat ve İskenderiye limanlarına gelen kahve ve pirinç ve emti‘a-i Mısriyye evvel-emirde Der-aliyye’ye gelecek Devlet-i Aliyye tüccâr sefâinine tahmîl ve tüccâr sefâini hamûlelerini alıp alarga oldukdan sonra yine Dersa‘âdet’e gelecek üç direkli ve sâir sefînelere teşhîn ve onlar dahi tamam olup açıldıkları akībinde kefere limanına vürûd eden müste’men sefînelerinden doğru İstanbul’a gelmek ve ol tarafda konsoloslardan kavî sened alınmak şartıyla sefâin-i müste’menâna ve sâir gemilere zehâir-i merkūme ve emti‘a-i sâire-i Mısriyye vaz‘ ve Der-aliyye’ye tesyâr olunup İzmir ve Sakız ve Selanik iskelelerine gelecek müste’men gemilerine ve diyâr-ı âhara gider süfün-i sâireye zehâir-i mezkûre tahmîl olunmamak ve ehl-i İslâm ve Devlet-i Aliyye tüccâr sefâini İskenderiye limanında boş ve hâlî oldukça müste’men sefînelerine kat‘an hamûle vaz‘ olunmamak ve bundan mâ‘adâ sarâhaten ruhsatı şâmil fermân-ı âlî sâdır olmadıkça Dimyat İskelesi’nden müste’men sefînelerine emti‘a-i Mısriyye teşhîni memnû‘ olduğundan tüccârdan müste’men gemisi istîcâr ve Dimyat İskelesi’nden pirinç ve kahve ve sâir Mısır emti‘ası tahmîl ve Der-aliyye’ye nakil irâde eder olur ise ibtidâ Der-aliyye’ye arzuhâl ve İstanbul Gümrüğü Emîni ve elçiler ma‘rifetleriyle yarar kefîlleri ahz ve Gümrük defterine sebt ve ruhsatı nâtık emr-i şerîf i‘tâ ve ol cânibe vardıkda Vâlî-i Mısır tarafından ber-mûceb-i emr-i âlî buyruldu verildikden sonra istîcâr eylediği müste’men sefînesi Dimyat İskelesi’nden hamûle tahmîline ibtidâr ve eşyâ vaz‘ olunur ise ma‘rifet-i şer‘le tahrîr ve tescîl ve derûn ve bîrûnu memhûr kāimesi eşyâ sahibi yedine verilip İstanbul’a geldikde kāime-i mezkûre Gümrük Emîni’ne teslîm ve getirdiği eşyâyı kāimeye tatbîk olunup noksan zuhûrunda tüccârın tedîbi icrâ olunmak tenbîhâtını hâvî ve şerâit-i sâireyi muhtevî bâlâsı hatt-ı hümâyûn ile mu‘anven iki yüz yedi senesi emr-i şerîf sâdır olmuş iken Mısır’ın çend seneden beri ihtilâline mebnî nizâm-ı mezkûra ri‘âyet olunmadığı tahkīk olunup nizâm-ı sâbıkın i‘âdesiyle fîmâ-ba‘d îfâ ve icrâsı husûsuna ihtimâm ve dikkat ve hilâfı mikdâr-ı zerre vukū‘a gelmekden mücânebet olunmak bâbında işbu sene-i mübârekede dahi Mısır Vâlîsi’ne ve Mısır Kādısı’na ve İskenderiye ve Dimyat ve Reşid kādılarına ve Gümrükcü ve İskele ümenâsına hitâben bâlâsı hatt-ı hümâyûn-ı şevket-makrûn ile muvaşşah başka ve o makūle pirinç ve kahve ve sâir erzâk-ı Mısriyye ile mahmûl sefâin [40b] gelir ise hamûlesinden bir dirhem şey çıkarılmayıp cümlesi doğru Dersa‘âdet’e sevk ve irsâl olunması için İzmir Mollası’na ve a‘yânına ve Voyvoda ve Gümrükcü ve sâire ve Selanik’e ve Sakız Cezîresi’ne başka başka evâmir-i şerîfe ısdâr olunmağla imdi nizâm-ı mezkûrun ale’d-devam icrâsı husûsuna nezâret ve vürûd eden sefîneleri bi’t-taharrî nizâm-ı mezkûra tatbîk birle mugāyir-i nizâm vürûd eder olur ise keyfiyetlerini sıhhati üzere Bâb-ı Âlî’ye ifâdeye mübâderet ve bir tarafdan külliyetlü tüccâr sefâini irsâliyle celb-i erzâka dikkat eylemelerini tüccâr ve sâir lâzım gelenlere tenbîh ve te’kîde dikkat eyleyesin deyü buyruldu. Fî 18 min-Muharrem sene 1220