İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 225 Hüküm no: 130 Orijinal metin no: [54b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’daki at hamalları ve merkepçilerin, hayvanlarını ikindi ezanından sonra ve cuma günleri çalıştırmamaları, yük indirildikten sonra üstüne binmemeleri ve yoldaki insanlara dikkat ederek orta hızda sürmeleri At hammâlları ve merkebcilere yasak fermânıdır. Bâ-sahh-ı âlî. İstanbul Kādısı Fazîletlü Efendi ( ) ve İzzetlü Yeniçeri Ağası Âsitâne-i aliyye ve tevâbi‘i iskelelerinde olan at hammâlları tâifesi i‘mâl eyledikleri bargirleri eyyâm-ı cum‘ada işletmeyip meks ü ârâm ve sâir eyyâmda dahi vakt-i asrda ezân-ı şerîf kırâet olundukdan sonra terk-i istihdâm olunmak mu‘tâd olup ve bâ-husûs nakl-i ahmâl akabinde bargirlerine rükûbdan men‘ için semerleri üzerlerine çatal demir vaz‘ olunmak üzere mukaddemâ fermân-ı âlî sâdır ve cümleye tenbîh-i ekîd olunup men‘ ü zecr olunmuş iken ahd-i karîbden beri içlerinden ba‘zıları hilâf-ı emr-i âlî ve mugāyir-i kadîm semer demirlerini ihrâc ve âriyetî demir i‘mâl eyleyip ahmâlini iskeleden mahallerine nakleyledikden sonra âriyetî demiri ihrâc ve üzerine süvâr ve yollarda ricâl ve nisâ ve sıbyân makūlelerine ve ihtiyâr adamlara bakmayıp sür‘at ile sevk ve tesyîr eylediklerinden râst geldikleri çirkâb ve çamurları ibâdullâhın üzerlerine neşrederek libâslarını telvîs ve nicelerinin dahi üzerlerine uğratıp ızrâr eyledikleri ihbâr ve tahkīk olunmağla imdi fîmâ-ba‘d ber-vech-i mu‘tâd at hammâlları tâifesi Saray-ı hümâyûndan mâ‘adâ mahallere eyyâm-ı cum‘ada bargirleri ve kereste ve tuğla ve kiremit ahmâlini nakleden merkebciler dahi merkebleri ile ahmâl ve eskāl naklinden men‘ ve eyyâm-ı sâirede dahi ezân-ı şerîf-i salât-ı [asr] okundukdan sonra bargirlerin ve merkeblerin istihdâm eylemeyip istirâhat ve ârâm için ahır ve hanlarına nakil ve rabt ve bargirleri üzerlerinde olan çatal demirleri âriyetî olmayıp yerlü demir olarak yedeklerine alıp seyr-i vasat ile sevk ve tesyîr eylemelerini kethudâları ma‘rifetleriyle cümlesine ba‘de’t-tenbîh hilâfına hareket edenleri ahz ve tedîb için huzûrumuza ihzâr eylemelerini kal‘a kapılarında ve dâhilinde kolluk bekleyen çorbacılara ve kol çukadârlarına tenbîh ve tefhîme mübâderet eyleyesiz deyü buyruldu. Fî 11 S sene [1]221