İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 237 Hüküm no: 138 Orijinal metin no: [58a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuzuları dükkân yüzüne asmayıp gizlice yüksek fiyattan satan kasapların cezalandırılacağı Kassâbâna kuzu için fermân. İstanbul Kādısı Fazîletlü Efendi ( ) ve İzzetlü Yeniçeri Ağası ( ) ve Kasabbaşı Ağa Bir müddetden beri kasab esnâfı narh-ı cârîye kanâ‘at ve emir ve tenbîhe itâ‘at etmeyip narhdan ziyâdeye füruht edegeldiklerine binâen kendilere bi’d-defa‘ât te’kîd olunduğundan başka rûz-ı hızırdan bir gün mukaddem beyâz üzerine evâmir-i aliyye ısdârıyla mahsûs cümleye tenbîh olunmuş iken yine mütenebbih olmayıp bu def‘a Sultân Bâyezid kasablarından Kasab Mustafa tama‘-ı hâmından nâşî kuzuları dükkân yüzüne asmayıp gizleyerek dilediği mahallere zenbil derûnunda hufyeten irsâl ile ziyâde bahâya füruht eder iken ahz ve cezâsı tertîb olunmağla imdi fîmâ-ba‘d narh-ı şâhâneden ziyâdeye her kim füruht eder ve dükkân yüzlerine asmayıp gizlüce satar ise günâhı boyunlarına olsun derhâl tertîb-i cezâ olunacağı mukarrer olunduğundan, bilip bil[me]dim demesinler. Bi’l-cümle kassâbâna bu husûsu gereği gibi i‘lân ve ifâdeye dikkat eyleyesiz deyü buyruldu. Fî 19 S sene [1]221