İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 242 Hüküm no: 143 Orijinal metin no: [59b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yabancı devletlerin elçi veya konsolosları yanında tercüman veya tercüman hizmetkârı olan Tülbentçi Babalıoğlu gibi esnafa, ya beratları gereğince esnaflığı ya da bu görevlerini bırakmaları hususunda tembihte bulunulması Berâtlulara dâir fermân. Bâ-sahh-ı âlî. İstanbul Kādısı Fazîletlü Efendi Berâtlu maddesine dâir ber-vech-i kat‘î ta‘alluk eden irâde-i seniyye etrâfıyla ma‘lûmunuz olup muktezâ-yı münîfi icrâ olunmak lâzımeden iken dülbendci esnâfından Babalıoğlu ve sâir o makūle ba‘zı zimmîler icrâsı matlûb-ı kat‘î olan berat şurûtuna mugāyir olarak el-yevm dükkân ve odalarında alış-verişleriyle meşgūl olup ma‘a-hâzâ o makūle himâyeye girenler yedinde sened olan beratında musarrah olduğu vechile tercüman veyâ hizmetkâr olduğu mahâlde ikāmet ve hizmetinden hâric mu‘âmeleden mücânebet etmek ve eğer sarrâflık ve dülbendcilik ve sâir o makūle esnâflık ile Dersa‘âdet’de oturak ise farazan Girid tercümanlığıyla Âsitâne’de dülbendcilik mâni‘atü’l-cem‘ olduğuna mebnî beratını terk eylemek iktizâ edeceği ve bu maddede iğmâz ve terâhî me’mûrlar hakkında mûcib-i ıtâb olacağı zâhir olmağla mesfûr Babalıoğlu ve sâir o makūle dülbendci ve sarrâf ve esnâfdan olup beratını adem-i terk ile el-yevm alış-verişinde ve dükkân ve odası küşâde kimler ise kethudâları ve sâir iktizâ edenler ma‘rifetleriyle bugün huzûrunuza ihzâr ve o makūle beratlulardan yarından sonra dükkân ve han odasında dülbendci ve sarrâf ve sâir esnâf meşhûd olmak lâzım gelir ise mûcib-i vahâmet idiğini kat‘an ifâde ve iş‘âr edip beratı mûcebince hareket veyâhûd efrâd-ı re‘âyâdan olup hilâf-ı şur[û]t mu‘âmeleden mücânebet etmek üzere tenbîh ve te’kîde mübâderet ve bu vechile kat‘-ı madde birle sûret-i nizâmını bugün huzûrumuza inhâya müsâra‘at eyleyesin deyü buyruldu. Fî 24 S sene [1]221