İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 323 Hüküm no: 223 Orijinal metin no: [84a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müslüman kadınların Frenk tarzı elbise diktirmemesi, terzilerin de bu tarzda elbise dikmemesi Nisâ tâifesine Frengâne esvâb dikilmemek için terzilere ve sâir iktizâ edenlere tenbîh. Bâ-sah. İstanbul Kādısı Fazîletlü Efendi Âsitâne-i aliyyede olan nisâ tâifesinin kā‘ide-i ırz u âdâba ri‘âyet ederek ehl-i İslâma şâyân elbise telebbüs ve etvâr-ı sefîhâneden mücânebet eylemeleri lâzımeden iken bir müddetden beri bu emr-i lâzımü’l-ihtimâma ri‘âyet olunmadığından tâife-i merkūmeden ba‘zı edebsiz makūleleri terzi esnâfını ıtmâ‘ ve onlar dahi tama‘-ı hâma teba‘iyet birle tâife-i merkūmenin taleb ve hâhişleri üzere hilâf-ı resm-i kadîm şerid ve bükme ve bed-renk ve envâ‘-ı nukūş ile müzeyyen nev-zuhûr diyerek ferâce yakaları ve kurdele ile Frengâne envâ‘-ı elbise dikip tâife-i merkūmenin ba‘zı bî-edebleri bu makūle ferâce ve elbise-i Efrenciyyeyi telebbüs ile esvâk ve pazar ve sâir mesîre ve cem‘iyetgâhda geşt ü güzâr ederek bî-edebâne harekete ictisâr etmeleriyle bu husûsun terzilere tenbîh ve te’kîdiyle fîmâ-ba‘d o makūle dikişler dikilmeyip kadîmden ne vechile ferâce ve esvâb dikilir ise yine ol vechile i‘mâl olunmak husûsuna ve işbu Frengâne amelin külliyen men‘ u def‘ine irâde-i kerâmet-ifâde-i cenâb-ı tâc-dârî ta‘alluk etmekle imdi Âsitâne-i sa‘âdetde kâin bi’l-cümle mahallât imâmlarını ve terzi esnâfı kethudâsını huzûr-ı şer‘a ihzâr ile fîmâ-ba‘d nisâ tâifesinin büyük yakalı ve şerid ve bükmeli ferâce ve sâir Frengâne libâs dikmeğe terzi esnâfına yasak olduğunu ve fîmâ-ba‘d terzilere o misillü ferâce ve esvâb diktirmek memnû‘ idiğini mahallesi halkına gereği gibi ifâde ve tenbîh eylemelerini mahallât imâmlarına ve terzi esnâfının dahi bu misillü büyük yakalı ve şerid ve bükmeli ferâce ve kurdele ile Frengâne libâs dikmekden mübâ‘adet etmelerini ve o makūle esnâf gerek âşikâre dükkânlarında ve gerek mahfiyyen hâne ve odalarında bu kâr-ı memnû‘a ictisâr ederler ise sırren ve alenen tecessüs olunarak lede’t-tahkīk haklarında ukūbetden gayri mu‘âmele olunmayacağını esnâfa muhkem tenbîh etmesini Terzibaşı’ya i‘lân ve ifhâma mübâderet ve bu yasak evkāt-ı sâirede olan yasağa makīs olmayıp mücerred bâ-irâde-i seniyye-i Pâdişâhî men‘ olunmuş mevâddan olduğundan -Etî‘u’llâhe ve etî‘u’r-Resûle ve üli’l-emri minküm- nass-ı kerîmi muktezâsınca bu emr-i vâcibü’l-imtisâle itâ‘at cümleye vâcibe-i zimmet-i diyânet olduğundan başka bu husûsun ardı boşlanmayıp mahsûs tebdîller ihrâcıyla ale’d-devam tecessüs ve taharrî olunacağı ve bir takrîb işbu memnû‘ olan eşyâyı bir terzi odasında ve hânesinde gizlüce diktiği haber alındıkda ibreten li’s-sâirîn dükkân ve odası önünde salb ve katl ile cezâsı tertîb olunacakları muhakkak ve mukarrer idiğini Terzibaşı’nın gûş-ı hûşuna bir iyice ifâde ve telkīn ve bu husûsa ale’d-devam nezâret eylemelerini tenbîh ve te’kîde dikkat ve işbu fermân-ı âlînin sicillâta kayd ile vakit be-vakt tenfîz ve icrâsına siz dahi i‘tinâ ve gayret eyleyesiz deyü. Fî 13 Rebî‘ülâhir sene 1222